VMI ENKONTRU HO AUTORIDADE MUNISIPIU BOBONARO HODI REFORSA SEGURANSA IHA FRONTEIRA


2Batugade, 08 jullu 2021 (SRP) – Relasiona ho virus variante Delta ne’ebe nia evolusaun tama ona iha Indonezia, Vise-Ministru Interior (VMI), halo enkontru koordenasaun ho autoridade Munisipiu Bobonaro, hodi buka servisu hamutuk ho Komandu PNTL Munisipiu Bobonaro reforsa seguransa iha fronteira. “Ohin enkontru hamutuk ho Sekretariu Administrador Munisipiu Bobonaro ho Administrador Postu Balibo inklui mos Komandante PNTL Bobonaro, komandante UPF, komandante eskuadra no mos OPS sira, ita koalia liu konaba oinsa maka sira bele servisu hamutuk ho komunidade para bele halo prevensaun rigorozu no tau atensaun iha fronteira liga ba variante Delta Covid-19”, dehan Antonio Armindo, ba jornalista sira hafoin remata enkontru ne’e iha Batugade. Nia dehan, asaun servisu hamutuk ho autoridade seguransa ne’e, nudar parte ida hodi evita transmisaun peste letal foun tanba nasaun viziñu Indonezia kontinua eziste propagasaun variante Delta ne’e. “Ohin ita rekomenda ba autoridade seguransa sira atu bele servisu hamutuk ho autoridade lokal sira no komunidade sira ne’ebe hela besik iha fronteira hodi hare ba iha jestaun seguransa nian tanba sira mesak labele halo buat ida tanba nee sira tenke servisu hamutuk ho komunidade hotu oinsa bele tau matan diak liu ba iha ita nia fronteira” nia dehan. Governante ne’e husu ba autoridade seguransa no autoridade munisipiu sira atu halo mos kampaña ba komunidade sira iha area fronteira hodi tuir vasina no alerta nafatin ba moras foun ne’ebe bele daet mai ita nia nasaun. “Hanesan ita hotu hatene ita nia fronteira ne’e luan demais no ita nia membru sira limitadu hodi kobre hotu kedas area fronterisa, tanba ne’e ita hotu iha ne’e buka halo aprsimasaun fuan ho laran hodi hakbesik an ba komunidade sira nafatin tuir vasina hodi diminui moras at ne’e labele mai iha Timor-Leste nune’e Guvernu nafatin esforsu hodi tau matan ba fronteira” nia sujere. Entretantu Sekretariu Munisipiu Covalima, Julio Caeiro hato’o agradesimentu ba Guvernu ne’ebé fó sira nia informasaun adisional nune’e bele reforsa liu tan atu bele hola responsabilidade para hadiak. “Agradese ba hanoin diak husi parte Guvernu tanba ami parte fronteira ne’e risku tebes ba moras barak. Oras ne’e daudaun ami servisu konjunta iha ekipa “task force” ida no ami prontu kopera ho autoridade seguransa sira nune’e ami sei konvida fali Konsellu Suku hodi pasa fali informasaun ne’eba sira hodi habelar ba komunidade sira ba to’o iha nivel Suku no Aldeia to postu sira”, dehan Julio Caeiro. Atividade enkontru ne’e, realiza iha Sede Migrasaun Batugade nian, ne’ebé hetan partisipasaun husi Komandante Munisipiu Bobonaro, Komandante UPF, Komandante Tranzitu Nasional, Komandante Polisia Komunitaria, Komandante BOP, Komandante Skuadra no Komandante OPS sira. #AX