enpt-pttt
August 1, 2021 3:47 AM

VISE-MINISTRU INTERIOR, ANTONIO ARMINDO, RELATA SEGURANSA RAI LARAN BA PM

image_pdfimage_print
1DILI, 7 juñu 2021 (SRP) – Vise-Ministru Interiór, Antonio Armindo, hamutuk ho Komandante Jeral PNTL, Komisariu Polisia Faustino da Costa no-mos Segundu Komandante Jeral PNTL, Komisariu Mateus Fernandes, iha loron segunda ne’e, relata situasaun seguransa jerál iha rai laran ba Primeiru-Ministru (PM), Taur Matan Ruak, iha rezidénsia ofisiál Primeiru Ministru nian iha Farol. “Ohin hau hamutuk ho komisariu nain rua halo enkontru ho Primeiru-Ministru hanesan mós Ministru Interior hodi relata situasaun seguransa jerál iha rai laran no-mós aprezenta kona-ba situasaun ne’ebé maka foin akontese foin dadauk ne’e iha Lahane”, esplika Vise-Ministru Interiór, Antonio Armindo, ba jornalista sira iha rezidénsia ofisiál PM nian iha Farol, segunda ne’e. Vise-Ministru Antonio hateten, ba kazu Ainitas-Hun iha Suku Lahane Osidental oras ne’e iha ona prosesu nia laran. “Ba kazu ida ne’ebé akontese iha Lahane Komandu rasik foti ona asaun ho prosedementu disiplinar hodi detein oknum no tama iha prizaun preventiva, enkuantu ba prosesu kriminal nian agora daudaun Komandu fó ona ba Servisu Investigasaun Kriminal Nasional (SIKN) ho Polisia Sientifika Investigasaun Kriminal (PSIK) maka halo invistigasaun no ita hein ninia rezultadu”, dehan Antonio Armindo. Governante ne’e hateten, hafoin PSIK no SIKN remata prosesu tomak maka sei submete ba Ministeriu Publik no nia finalidade sei entrega ba tribunal hodi foti desijaun tuir dalan legal. “Ita hatene katak oras ne’e públiku kestiona kona-ba oknum ne’ebé maka halo ami hotu la kontente kona-ba ida ne’e. Presija tau iha atensaun katak se maka sala nia hatan nia sala. Ho akontesementu ne’ebé iha, polisia kontinua hala’o nafatin ninia servisu hanesan konsagra tiha ona iha konstituisaun RDTL para atu servi povu no proteze povu”, governante ne’e subliña. Iha biban ne’e, Vise-Ministru Antonio Armindo, husu atu komunidade hotu servisu hamutuk hodi tau nafatin konfiansa ba PNTL tamba PNTL nudar instituisaun Estadu nian. Nia mos agradese ba kritika balu husi sosiedade sivil no públiku tomak katak rekomendasaun no sujestaun pozitivu sira sai hanesan lisaun ida hodi dezenvolve PNTL. “Ita mós lakohi ita nia instituisaun ne’e marka pasu hanesan ne’e deit. Tamba ne’e presija nafatin kritika para ita bele dezenvolve se la kritika ita hanoin buat hotu di’ak deit, ita nafatin simu nafatin hanoin balu husi povu para bele hadi’ak ita nia Instituisaun PNTL tamba Ministériu Interiór ninia papél maka oinsa oinsá atu dezenvolve institusaun PNTL sai instituisaun ida ne’ebé profisionál, hakbesik ba povu, no instituisaun ida ne’ebé bele sai amigu di’ak hodi serve povu no nasaun. Tanba ne’e maka agora hanoin liután atu dezenvolve instituisaun di’ak liután, kontinua fó formasaun ba membru, haree bem estar, no tenke hadi’a sira-nia moris,” tenik Vise-Ministru Antonio Armindo.

Comments are closed.