NÚNSIU APOSTÓLIKU IHA TIMOR-LESTE HASORU MALU HO VMI


1Dili, 08 jullu 2021 (SRP) – Vise Ministru Interior, Antonio Armindo, simu vizita husi Núnsiu Apostóliku Munseñor Marco Sprizzi akompaña husi Amu Vigariu Leandro Maria Alves no Diretór Jerál Servisu Migrasaun, Superintendente, Luis Soares Barreto hodi ko’alia kona-ba akordu no mudansa Lei Migrasaun nian iha ne’ebé konkordata vistu ba Misionáriu sira husi Santa Sé ne’ebé hala’o sira-nia misaun ba kreda no sarani sira iha Nasaun Timor-Leste. Objetivu husi enkontru daruak ne’e ko’alia kona-ba mudansa lei Migrasaun ne’ebé lao daudaun e Núnsiu Apostóliku hato’o mós mensajen husi Amu Papa Francisco mai sarani sira iha Timor-Leste.
Iha biban ne’e, Núnsiu Apostóliku Munseñor Marco Sprizi hato’o komprimentus husi Amu papa Francisco ba sarani no Timor oan Tomak iha Nasaun ida-nee. “ohin ha’u mai iha ne’e hasoru malu ho Vise Ministru Interior ko’alia kona-ba akordu ne’ebé ami ko’alia ona iha enkontru dahuluk, iha loron 14 fulan Dezembru tinan 2020, iha ne’ebé sita kona-ba kestaun konkordata hodi fó vistu longu prazu ba Misionáriu sira husi Santa Sé. Haree ba mudansa husi lei Migrasaun ne’ebé lao daudaun ami hakarak agradese ba Vise Ministru Interior ho estrutrutura tomak ne’ebé konsidera ami-nia akordu ne’ebé konkorda fó vistu ho longu prazu ba misionáriu sira bele hela iha Timór hodi hala’o servisu Misionariu nian hodi tulun kreda no sarani timor oan hotu iha nasaun Timor-Leste’’. Ikusliu Núnsiu Apostóliku apresia no agradese ba esforsu no servisu ne’ebé Nasaun Timor-Leste hala’o liuhusi Ministériu Interior ho Santa Sé.
Jornalista : Elisa Barreto
Editora : Fatinha