Dili-ohin 10 Juñu 2019, Ekipa Juri hosi Diresaun Nasional Prevensaun Konflitu Komunitáriu (DNPKK) no Diresaun Nasional Rekursus Humanus (DNHR), Ministériu Interior hahú hala’o entrevista ho aplikante 160 ne’ebé passa ona dokumentus ba vaga téknika mediasaun, ne’ebé públika sai hosi DNPKK iha loron 25 to’o 29 marsu 2019. Aplikante hirak sei tuir entrevista durante semana ida, hahú hosi 10 to’o 14 Juñu 2019 iha salaun Sekretariadu PAN 1325, Ministériu Interior, Vila-Verde, tuir oráriu ne’ebé determinadu ona iha loron dahuluk 10 Juñu 2019, entrevista aplikante hamutuk 32 hosi munisípiu Baucau 2, Manatuto 5, Lautem 15, Bobonaro 8 no Díli 2. Entrevista ba loron daruak iha loron 11 Juñu 2019 sei entrevista aplikante hosi munisípiu Ainaro ema 16 no Liquisa 16. Loron datoluk munisípiu Viqueque 14, Manufahi 10 no Díli 8. Tama loron haat munisípiu Aileu 25 no Díli 7, hakat ba loron dalima munisípiu Emera ema nain 29 no Díli ema nain 3. Enkuantu, ekipa juri kompostu hosi Prezidente Juri Diretora DNPKK, Sra. Lidia Lopes de Carvalho, membru Juri Xefe Departamentu Prevensaun Konflitu (DPK) Sr. Martinho Carvalho Sarmento, Xefe Departamentu Rezolusaun Konflitu (DRK), Sr. Julião Fernandes, Xefe Departamentu Administrasaun DNPKK, Sr. Patricio Moreira da Silva, no Xefe Departamentu Administrasaun DNRH, Sra. Saturlina Pereira. *CM*

Dili-iha sesta feira, 07 Juñu 2019 foin lalais ne’e, ekipa hosi Diresaun Nasional Prevensaun Konflitu Komunitária (DNPKK) ho Rede Nasioal Prevensaun Konflitu (RNPK) implementa programa Edukasaun Sivika hodi transmite informasaun kona-ba “Prevensaun no Rezolusaun Konflitu, Papel DNPKK, Perigu Konsumu Drogas, Tráfiku Umanu, Lei Armas Brancas, Étika Morál no Reflesaun Esprituál ”, ba lideransa komunitária no juventude iha suku Bairo Pite, Postu Administrativu Dom Aleixo. Edukasaun sivika ne’e hala’o ho intensaun atu hasa’e konsénsia no valoriza moris juventude sira-nian, prevene atu labele mosu konflitu, alerta antes ba juventude kona-ba prevensaun no rezoluasaun konflitu. Tuir lideransa komunitária suku Bairo Pite hateten katak disiminsaun informasaun liuhusi programa edukasaun sivika ne’e importante tanba eleva koñesimentu lideransa komunitária no juventude sira-nia atu bele prevene konflitu no kumpri lei no regras sira. Enkuantu, Xefe Aldeia Ruin Naklekar, Suco Bairo-pite Sra. Saldina Guteres Cardoso afirma programa edukasaun sivika ne’e parte ida atu aumenta kapasidade no koñesimentu hodi habelár ba informasaun refere ba komunidade sira liu-liu ba juventude sira. Iha fatin hanesan Xefe Juventude Suku Bairo Pite Sr. Marcos Ximenes haktuir programa edukasaun sivika atu loke espasu ba sosiedade ho haklean sira-nia konesimentu kona-ba regras no lei hodi bele kontribui di’ak liu ba sira ninia moris lor-loron nian. Edukasaun Sívika realiza durante loron ida hanesan programa dahaat ne’ebé hala’o iha sede suku Bairo Pite ne’ebé ofisialmente loke hosi Diretora DNPKK, Sra. Lidia Lopes de Carvalho akompaña hosi Xefe Suku Bairo Pite, João Baptista da Costa Belo, Xefe Seksaun Polisia Komunitária, Sr. Pedro Madeira, Inspetór Polisia, Sr. Domingos Gama hosi Gabinete Juridiku PNTL. *Estajária*.

Ainaro-iha loron sesta feira, 07 Juñu 2019 foin lalais, Diretór Diresaun Nasional Seguransa Patrimóniu Públiku (DNSPP), Sr. Francisco Soares ho Xefe Departamentu Rezolusaun Konflitu, Sr. Julião Fernandes ne’ebé repezenta Diretora DNPKK prezide serimónia entrega serbisu no transferénsia Sr. David Pacheco Magno nu’udar funsionáriu permanente nivel 3 hosi DNPKK ho Sr. Fernando Cardoso Martins funsionáriu permanente nivel 3 hosi DNSPP. Serimónia entrega serbisu no transferénsia hala’o iha edifísiu DNSPP Ainaro, ne’ebé indika Sr. Fernando Cardoso Martins anteriór hanesan Suprevizór Zona DNSPP Ainaro, sei asumi knaar foun nu’udar Kordenadór Serbisu Prevensaun Konflitu Komunitáriu munisípiu Ainaro hodi subtitui Sr. David Pacheco Magno ninia pozisaun, enkuantu Kordenadór sesante Sr. David Pacheco Magno sei hala’o ninia knaar hanesan funsionáriu apoiu serbisu administrasaun DNSPP iha munisípiu Ainaro. Diretór DNSPP Sr. Francisco Soares iha serimónia hateten “ami mai iha ne’e atu implementa deit ordem hosi superiór sira, bazeia ba despasu husi Diretór Jerál serbisu operasionais atu halo transeferénsia ba funsionáriu husi Diresaun ida ne’e ba Diresaun ida ne’e. Tanba ita hamutuk iha oras ida nia laran atu halo serimonia termu de entrega serbisu. Ita iha diresaun jerál ida de’it, Sekretáriu Estadu ida de’it, maibé ambiente, karatér, no natureza serbisu mak diferente oituan. Ne’ebé ha’u nia hanoin ne’e depois mak ita boot nain rua bele adapta”. Sr. Francisco aprofunda “intensaun transferénsia ne’e la’os dehan ida serbisu at, la’os hirus, la’os laran moras malu mak hodi muda malu, maibé ida ne’e hanesan desizaun ita transfere deit, serbisu kuaze hanesan deit, hanesan ita ko’alia ona nu’udar funsionáriu públiku ida tuir lei katak funsionáriu permanente ida prontu atu koloka iha ne’ebé de’it, nomós transferénsia ne’e hanesan promosaun ida ka promove malu, atu bele dudu serbisu ba oin, no atu hariku tan ita-nia esperénsia, nune’e iha futuru mai ita prontu serbisu saida de’it”.
Diretór DNSPP husu ba parte rua kontinua serbisu hamutuk iha kordenasaun no koperasaun di’ak, atu halo atendimentu iha públiku, fó seguransaun ba patrimóniu públiku no halo prevensaun ba konflitu ne’ebé atu estraga ka sunu fali patrimóniu públiku.
Iha okaziaun ne’e repezenta Diretora DNPKK, Xefe Departamentu Rezolusaun Konflitu, Sr. Julião Fernandes agradese ho disponibilidade Diretór DNSPP ne’ebé oferese ona funsionáriu DNSPP nian ida, hodi subtitui funsionáriu DNPKK nian.
Xefe Departamentu fundamenta katak “transferénsia serbisu hala’o bazeia ba ordem hosi ita-nia superiór sira, maibé ita iha uma kakuluk ida de’it, natureza serbisu mak la hanesan, bainhira ita tama funsionáriu públiku kritériu ida mak atu koloka funsionáriu sira iha ne’ebé de’it. Entaun transferénsia atu transfere hosi fatin ba fatin ida, dala ruma ita serbisu iha fatin ida mak ambiente ne’e la cocok ka konfortavél ho ita, presiza iha transferénsia atu nune’e bele aprende buat foun ne’ebé konfortavel ho ita. Ba Kordenadór foun Sr. Fernando serbisu DNPKK hanesan serbisu foun ida, la hanesan ho serbisu DNSPP nian. DNPKK ninia serbisu mak haree liubá iha área prevensaun konflitu, ne’ebé presiza serbisu hamutuk ho autoridade lokál, polisia komunitária no lideransa komunitária oinsa bele fasilita diálogu no mediasaun ne’ebé akontese iha komunidade sira-nia le’et”. Iha serimónia ne’e, Kordenadór sesante Sr. David Pacheco Magno entrega fasilidade hanesan motorizadu ho tipu mega pro 1, komputadór HP no printer HP 1, armáriu, meza, kadeira, xavé eskritóriu no dokumentus serbisu nian ba Kordenadór indigitado, Sr. Fernando Cardoso Martins atu bele hala’o serbisu. *CM*

Dili-bazeia ba rezultadu selesaun dokumentus ne’ebé hala’o hosi ekipa Juri Diresaun Nasional Prevensaun Konflitu Komunitáriu (DNPKK) no Diresaun Nasional Rekursus Humanus (DNHR), Ministériu Interior durante loron 3, hahú hosi 15 to’o 17 abril 2019, rezulta aplikante hamutuk 160 mak pasa ona iha faze selesaun dokumentus ba vaga mediadór no sei tuir entrevista iha loron 10 to’o 14 juñu 2019. Ho rezultadu ida ne’e, iha loron 30 maiu 2019, ekipa DNPKK hahú publika ona naran aplikante sira nian iha kada munisípiu, atu tuir entrevista ne’ebé sei hala’o iha Dili, loron 10 to’o 14 juñu 2019, iha salaun Sekretariadu PAN 1325 Ministériu Interior, Vila-Verde bazeia ba oráriu ne’ebé determina hosi ekipa juri. Entretantu, aplikante hirak ne’e konkore ona 39 vaga mediadór, ne’ebé públika sai hosi DNPKK iha loron 25 to’o 29 marsu 2019, hosi munisípiu 11 ne’ebé submete dokumentus hamutuk 818, mane 513 no feto 305, maibé aplikante ne’ebé selesionadu no pasa dokumentus hamutuk 160, mane 100 no feto 58, kompostu hosi 11 munisípiu; Aileu pasa 25 pesoas, Ainaro 16, Baucau 2, Bobonaro 8, Dili 20, Ermera 29, Likisa 16, Lautem 15, Manatuto 5, Manufahi 10 no Viqueque 14. Enkuantu, aplikante ne’ebé la pasa no eskluidu iha prosesu selasaun dokumentus hamutuk 660, mane 413 no feto 247 tanba la priense kritériu hanesan dokumentus la kompletu, laiha asinatura hosi aplikante rasik no parte testamuña, laiha espriénsia serbisu iha área relevante, indika laloos no seluk tan. Ekipa selesaun dokumentus kompostu hosi Prezidente Juri Diretora DNPKK, Sra. Lidia Lopes de Carvalho, membru Juri Xefe Departamentu Prevensaun Konflitu (DPK) Sr. Martinho Carvalho Sarmento, Xefe Departamentu Rezolusaun Konflitu (DRK), Sr. Julião Fernandes no Xefe Departamentu Administrasaun DNRH, Sra. Saturlina Pereira. *CM*

Dili-atu transforma mentalidade no komportamentu estudante sira-nian iha prevensaun konflitu Ministériu Interior liuhusi Diresaun Nasional Prevensaun Konflitu Komunitária (DNPKK) iha tersa feira (29/05/19) ne’e implementa programa Edukasaun Sivika hodi habelár informasaun kona-ba “Prevensaun no Rezolusaun Konflitu, Papel DNPKK, Perigu Konsumu Drogas, Tráfiku Umanu, Lei Armas Brancas, Étika Morál no Reflesaun Esprituál ”, ba estudante Ensinu Báziku Sentrál, Sergio Viera de Mello,(EBC-sigla portugés). Diretora DNPKK, Sra. Lidia Lopes de Carvalho iha abertura hateten DNPKK ninia serbisu mak iha área prevensaun no rezolusaun konflitu ho identifika konflitu no problema ne’eb’e akontese iha komunidade no eskola hafoin halo aprosimasaun no hamosu estratéjia hodi prevene konflitu. “Ohin ami-nia programa edukasaun sívika ninia targetu ba estudante sira iha eskola ho ninia objetivu atu hasa’e konsénsia no valoriza moris estudante sira-nian, atu prevene konflitu labele mosu iha eskola, alerta antes ba estudante kona-ba prevensaun no rezoluasaun konflitu”. Esplika Diretora. Diretór Eskola Sergio Viera, Sr. Manuel Pinto konsidera atividade edukasaun sivika nu’udar retiru no aprendizan di’ak ba estudante sira atu haree no hanoin hikas situasaun moris ema ida-idak nian. “Ohin iha ita-nia eskola iha atividade loron ida kona-ba edukasaun sívika hanesan retiru di’ak ba hetan informasaun prevensaun konflitu hodi ita boot sira nia moris hanesan estudante iha eskola, oan iha uma no joven iha komunidade, liu-liu ba estudante mane sira atu prevene fuma, hemu tua, sadik no baku malu. Hanesan oan iha uma ligasaun ho edukasaun sivika iha ligasaun ho sivilizaun umana oinsa ho ita boot sira-nia hahalok, komportamentu oan iha uma no eskola atu obedese Inan Aman no Profesór sira, atu kumpri devér estudante sira-nia ho didiak”, fundamenta Diretór Manuel. Diretór eskola haktuir “edukasaun hotu-hotu di’ak, edukasaun iha uma Inan Aman mak hanorin no kontrola, iha eskola profesór no iha komunidade maun no autoridade lokál sira mak orienta atu la’o ba buat diak, individu ne’ebé halo konflitu ne’e individu ne’ebé utiliza sala, liuhusi formasaun edukasaun sivika ne’e fó hanoin mai ita atu labele utiliza sala, ema uza didiak tuir ninia tempu, iha ninia fatin. Tempu iha eskola aplika matenek no siénsia tuir eskola nian, tenke hatudu matenek ho sivilizasaun iha uma no eskola”. Edukadór ne’e husu ba estudante atu halo reflesaun di’ak hodi hadi’a hahalok ladiak hasoru mestri, la la’o tuir ina aman ninia edukasaun, hahalok ida ne’ebé bele halo tuir no hahalok ida ne’ebé labele atu halo tuir. Atividade edukasaun sívika kompleta mós reflesaun esprituál ne’ebé nakonu sentidu forte ho lia fuan furak no lia fuan maromak nian hodi hafanu no hamosu sentimentu mata ween estudante sira-nian atu bele reflete no arepende fila fali sira-nia moris, liu-liu hahalok ladiak hasoru inan aman no famailia uma laran, komportamentu ladi’ak hanesan tolok no lia fuan kroat hasoru prefesór iha eskola. Entretantu, programa hanesan programa datoluk implementa iha eskola Sergio Viera de Mello, antes hala’o ona iha suku foun Ailok-Bcora, suku Dare no tuir planu sei hala’o iha suku Bairo Pite *CM*

Dili-Iha loron kuarta feira, 10 abril 2019, ekipa hosi Ministériu Negósiu no Estranjeiru halo audénsia ho Diretora Diresaun Nasional Prevensaun Konflitu Komunitáriu, Ministériu Interior (DNPKK-MI), Sra. Lidia Lopes de Carvalho husu disponibilidade DNPKK atu partisipa iha eventu ASEAN Regional Forum Workshop on Preventive Diplomacy and Early Warning; Linkages for Conflict Resolution. ASEAN Regional Forum sei oragniza hosi Ministériu Negósiu no Estranjeiru durante loron tolu hahú hosi 24 to’o 26 abril 2019, sei konvida ekipa DNPKK, Ministériu Interior ne’ebé reprezenta Governu Timor-Leste atu partilla esperiénsia no informasaun kona-ba mekanizmu prevensaun no rezolusaun konflitu iha Timor-Leste ba delegadu sira hosi nasaun 27 ne’ebé sei partisipa iha eventu refere.*CM*

REFLESAUN BA KRISTU NINIA MATE NO MORIS-HI’AS

Dili-Iha loron Sesta feira ne’e, (4/5 2019), Sekretariu Estadu Protesaun Sivil, Dr. Alexandrino Xavier Araujo, hamutuk ho diresaun kargu no xefia iha salaun enkontru Ministeriu Interior, halo retiru anual ho tema, “Ohin imi rona karik Nai nia lian, keta taka imi nia fuan”. Objetivu husi retiru ida ne’e, maka oinsa funsionariu estadu sira bele prepara an hodi simu festa, selebrasaun momentu ne’ebé Kristu ninia mate no moris-hi’as nomos oinsa atu funsionariu sira bele haraik-an, obedese, loke-an no pasiénsia, atu haklaken liafuan no barani ko’alia lia-loos, hala’o knaar hanesan funsionariu publiku ho di’ak. Iha retiru ne’e, Pe. Aniceto Barreto, O.Carm, ne’ebé ko’alia lia tetun ho lian Indonesia kahur malu, maibe nakonu ho espiritu bom pastor ne’e esplika katak, “Kuarezma mak tempu litúrjiku Kreda fó mai ita atu, liuhusi konversaun, ita bele halo preparasaun ba festa boot Páskua: paixaun, mate, resureisaun Na’i Jezús nian. Kuarezma mak tempu atu arrepende ba ita-nia salan sira no troka buat ruma iha ita nune’e bele sai di’ak liután no bele moris besik liután hanesan Kristu. Hafoin remata retiru, kontinua kedas ho konfisaun nomos misa hamutuk. Tama ba misa refere, Pe. Aniceto Barreto, iha nia homilia fo hanoin tan katak, “Kuarezma dura loron 40; hahú ho kuarta Akudesan nian no taka ho Kinta Santa, ho misa Han Kalan ikus Na’i nian. Durante tempu ne’e, liuliu iha liturjia domingu nian, ita halo esforsu atu rekupera ritmu no estilu moris fiar-na’in nian nu’udar Maromak nia oan loloos. Nune’e, kuarezma mak tempu perdaun nian no rekonsiliasaun fraterna. Loroloron, iha moris tomak, ita tenke fokit sai husi ita-nia fuan ódiu, hirus no vingansa, inveja, laran-moras, ne’ebé hanetik ka sai obstákulu ba ita-nia domin ba Maromak no maun-alin sira, Iha kuaresma nia laran, ita aprende mós atu hadomi Jezús nia Krús. Halo nune’e ita aprende mós atu lori ita-nia krús ho hakmatek, hodi to’o ba glória resurreisaun nian. #AX

Bobonaro-Xefe Departamentu Sekretariadu Administrasaun, Diresaun Nasional Prevensaun Konflitu Komunitáriu (DNPKK), Ministériu Interior, Sr. Patricio da Silva Moreira iha kinta feira (04/4/19) foin lalais ne’e partisipa serimonia tara bandu no simu malu entre Juventude suku Saburai, Postu Administrativu Maliana, Munisipiu Bobonaro. Serimonia tara bandu ne’e organiza hosi Ministériu Soliedaridade Sosiál no Inkluzaun (MSSI) ho objetivu atu halo prevensaun konflitu liuhusi meius kulturais hodi harii paz no koezaun sosiál iha komunidade sira-nia leet. Segundu Komandante Polisia Munisipiu Bobonaroa, Superientendante Asistente João da Costa ninia intervensaun iha serimonia hateten tara bandu ne’e importante ba komunidade sira-nia moris atu kria paz no hakmatek. “Tara bandu ne’e importante no fó benefisiu ba komunidade sira-nia moris, tanba hanesan regras ne’ebé vigora ona iha lei atu kontrola ita-nia an, regras rigorozu atu kumpri la’os hakerek de’it iha sora tan, regras no regulamentu tara bandu atu reforsa lei hotu-hotu, fundamenta Segundu Komandante Polisia Munisipi Bobonaro. Enkuantu eventu ne’e, hahú ho dalan rituál hosi lia nain suku Saburai ne’ebé oho animál no harii ai lulik hodi hamulak ba rai lulik, fatulik, foho lulik no uma lisan sira, hafoin fó juramentu no simu malu ba grupu juventude eis arte marsiais tolu hanesan; IKS, KORKA no PSHT ne’ebé sempre hamosu konfrontasaun iha suku refere. Partisipa iha serimonia ne’e kompostu hosi Sekretáriu Estadu Teras no Propiedades, Segundu Komandante PNTL Munisipiu Bobonaro, Reprezentante Presidente Autoridade Munisipiu Bobonaro, Administradór Postu, Xefe Suku, Xefe Aldeia, Membru Konsellu Suku, juventude no komunidade suku Saburai. *CM*

Dili-iha loron tersa feira, 02 abril 2019, Diretora Diresaun Nasional Prevensaun Konflitu Komunitária, Ministériu Interior (DNPKK-MI), Sra. Lidia Lopes de Carvalho akompaña hosi Konsultora DNPKK Sra. Adelia Guterres partisipa iha primeiru enkontru rede referál, ne’ebé organiza hosi Sekretaria Estadu Igualdade no Inkluzaun (SEII) iha salaun enkontru Maria Goreti. Enkontru ne’e parte ida atu partilla informasaun ba malu relasiona ho serbisu rede referál nian kona-ba atendimentu vítima Violénsia Sexuál no Violénsia Bazeia ba Jéneru ne’ebé akontese iha baze nomós diskute termu referénsia rede referál. Partisipa iha enkontru rede referál kompostu hosi instituisaun Estadu, Governu, Akademika, no Sosiedade Sivil hanesan PDHJ, MDS, MI-DNPKK, MEJD, MTCI, MSSI, PNTL-VPU, Defensoria Publika, Casa Vida, Care, Fokupers, Fundasaun Alola, Rede Feto, Acbit, Belun, JSMP, UN WOMEN, UNFPA no PLAN. *CM*

Dili-Ministériu Interior liuhusi ekipa téknika mediasaun hosi Diresaun Nasional Prevensaun Konflitu Komunitária (DNPKK-MI) iha sesta feira ne’e (29/03/19), fasilita mediasaun no kria akordu hodi solusiona kazu disputa plantasaun has entre grupu familia uma kain rua, ne’ebé akontese dezde tinan 2012 iha aldeia Klakfuik, suku Bekora. Liuhusi esforsu ekipa téknika mediasaun DNPKK nian hodi halo aprosimasaun no mediasaun ba parte rua ne’ebé envolve iha disputa, ho intensaun atu solusiona dezentendimentu grupu familia rua nian bele moris hakmatek no paz. Nune’e, iha rezultadu mediasaun parte rua konkorda no asina kordu hodi tesi plantasaun has ne’ebé sai baliza ba familia uma kain rua. Envolve iha prosesu mediasaun ne’e , kompostu hosi Sra. Joaquina Soares, Sra. Evalina da C. Guterres, Sra. Simoa Andre dos Santos, no akompaña hosi estajária UNTL, no hetan apoiu hosi parte Bombeiros, EDTL, OPS, no inklui autoridade lokál suku Bekora *CM*