Dili-Sidadaun estranjeiru nain 9 ne’e hetan prende iha area Comoro, liu husi operasaun ne’ebe hala’o husi Sektor Operasaun, Divizaun Kontrolu no Monitorizasaun halo Inspesaun, iha loron Sabadu 13 Abril 2019, tamba uza vistu turista hodi halo fali negosiu tama sai uma nomos servisu iha konstrusaun uma privadu balu. Nune”e ohin Tersa Feira, 16 Abril 2019, membru Servisu Migrasaun lori fila kedas sidadaun Indonezia nain 9 ne’e entrega iha autoridade Migrasaun Indonezia nian iha Batugade. Diretor Geral Servisu Mirasaun (DGSM), Superintendente Asistente polisia Boavida Ribeiro informa katak, liu husi operasaun ne’e, konsege identifika sidadaun estranjeiru nain 9 ne’ebe hala’o atividade profisional la ho dokumentu kumpletu. “Horseik ami nia membru sira husi Sektor Operasaun, Divizaun Kontrolu no Monitorizasaun halo Inspesaun, halo operasaun iha area Comoro nian, no konsege detekta sidadaun estranjeirus hamutuk ema nain 9. Husi ema na’in 9 ne’e, ema nain 4 halao atividade konstrusaun nian hanesan badaen, entaun komunidade sira maka fo informasaun mai iha polisia Servisu Migrasaun. Nain lima seluk hetan iha area Kampung Baru tanba, sai fali vendedor ambulante hodi faan sasan tama sai uma ho kareta Mikrolet, ne’ebe sira aluga husi maluk Timor oan sira balu. Sidadaun estranjeiru sira ne’ebe maka ita detekta ne’e mai husi Indonezia hamutuk ema nain 9 ho vistu turista. Entaun ita loke prosesu ba sira maka haruka sira sai husi Timor no durante tinan rua nia laran sira sei labele tama teritoriu nasional. Iha sorin seluk, Adidu Migrasaun husi KBRI (Kedutaan Besar Republik Indonesia) nian mai Timor-Leste, Sr. Eben Rizky, iha nia liafuan badak, husu ba sidadaun estrannjeiru sira ne’e, karik iha future mai, prepara dokumentus kompletu hanesan autorização de residência (ijin tingal), nune’e bele disponivel ho lei Servisu Migrasaun Timor-Leste nian. Hafoin remata prosesu tomak, hanesan bai bain membru Servisu Migrasaun tula kedas sidadaun sira ne’e ba entrega iha postu fronteira Batugade. #AX
