Tersa-Feira, Loron 14 Fulan Maiu tinan 2019, Xefe Gabinete Ministeriu Interior Interino Maria Helena Almeida de Jesus akompanha husi Reprezentante Diretor Jeral Servisu Migrasaun, Diretor Nasional Rekurzus Umanus no Vise Dekanu Fakuldade Siensia Sosiais, Bernardo Idalina Leto partisipa iha serimonia retirada estajiarius husi Universidade Nasional Timor-Lorosae, Fakuldade Siensia Sosiais, Departamentu Relasaun Internasional, iha Salaun enkontru Vila-Verde, Díli. Xefe Gabinete Maria Helena Almeida de Jesus iha breves palavras hato’o agradesimentu ba oportunidade husi estudante UNTL ne’ebe durante fulan rua nia laran hala’o ona estajiu iha Gabinete Ministru ninian no mos diresoens tutelas, espera katak estajiariu sira bele aprende buat barak husi Ministeriu Interior atu bele aplika fali iha Universidade no iha futuru mai. Iha Fatin hanesan, Diretor Nasional Rekurzus Umanus, Grinaldo Freitas hato’o parabens ba estudante UNTL ne’ebe konsege remata estajiu profesional hodi fó kontribuisaun mai Ministeriu interior e mos bele kompleta jornada estudu iha UNTL, “buat barak sira aprende husi ami hodi ense jornada naruk ne’ebe nakonu ho signifikativu e bele kompleta estudu ne’ebe klean liu tan”. Diretor ne’e mos Agradese ba estudante UNTL nia tulun maske fulan rua deit maibe kontribui ona servisu lubun ida hodi alkansa servisu Ministeriu Interior ninian. Iha Biban ne’e Vise Dekanu Estudantil, Bernardo Idalina Leto agradese ba dirijente máximu Ministeriu Interior ninian ne’ebe simu ona estudante sira hodi hala’o estajiu profesional durante fulan rua, “hau fiar katak sira aprende buat barak husi fatin ne’e e lori Universidade nia naran hakarak hatoo obrigada no kontinua kolabora no servisu hamutuk iha futuru mai.” Antes termina serimonia refere, Vise Dekanu Fakuldade Relasaun Internasional ne’e husu tulun ba estrutura kargus diresoens no xefia sira nia protidaun no kolaborasaun atu bele loke odamatan ba estudante sira husi fakuldade oi-oin iha Universidade Nasional Timor Lorosae ne’ebe sei nafatin hala’o estajiu iha Ministeriu Interior periodikamente. Serimonia refere partisipa husi Diretora Nasional Prevensaun Konflitus Komunitaria, reprezentante Diretora Jeral Servisus Koorporativus, Asesor Nasional, funsionarius Publikus no estudante UNTL. #Fati.
