Oecusse-Iha loron 06 marsu 2019, Sua Exelénsia Sekretáriu Estadu Protesaun Sivil, Alexandrino Xavier Araújo ofisialmente halo abertura ba workshop kona-ba “Direitu Umanus, Igualdade Jéneru no Saúde Reprodutiva”, nu’udar jestu ba komemorasaun loron mundiál feto 2019, durante loron rua hahú hosi, 06 to’o 07 marsu 2019 iha salaun Serão RAEOA. Objetivu hosi workshop ne’e atu fahe informasaun no hasa’e koñesimentu kona-ba “Direitu Umanus, Igualdade Jéneru no Saúde Reprodutiva ba feto no mane PNTL iha RAEOA, mezmu tempu komemora loron internasionál feto. Sua Exelénsia Sekretáriu Estadu Protesaun Sivil, Alexandrino Xavier Araújo iha abertura fó parabéns feto Timor-Leste ne’ebé sei selebra loron mundiál feto nu’udar reflesaun ida atu haree ba futuru. “Parabéns ba feto sira hotu iha Timor, parabens ba feto sira ne’ebé selebra loron mundiál feto iha 8 Marsu 2019, hodi preense atividade workshop loron rua 06 to’o 07 iha REAOA. Aproveita oportunidade ida ne’e hakarak hato’o mensajen de’it ba feto hotu ninia susesu ho semináriu ka workshop ne’ebé iha, atu halo reflesaun nu’udar feto ninia papel iha ida-idak ninia serbisu fatin no familia , ida ne’e sai reflesaun ida hodi haree ba futuru no ba loron aban”, haktuir Sekretáriu Estadu. S.E. Ministro Interior Interino ne’e akresenta workshop ne’e parte ida atu hafanun fali feto sira hodi ezerse ninia funsaun iha serbisu fatin no tempu luta. Tanba feto ho mane nu’udar parseiru importante atu la’o hamutuk iha serbisu fatin nomos dezenvolvimentu ekonomia no komunidade nian. Sr. Alexandrino Xavier agradese mós inisiativa UN WOMEN, TLPDP, PNTL no DNPKK ne’ebé organiza workshop ida ne’e hodi selebra loron mundiál iha Timor-Leste. Iha fatin hanesan Segundu Komandante PNTL, Komisáriu Faustino da Costa iha ninia mensajen badak k hateten susesu mane sira-nian la’os tanba feto iha mane sira-nia kotuk, susesu mane nian tanba feto sempre iha mane sira-nia sorin no sempre hamutuk ho mane sira, ne’ebé sai realidade ida atu responsabiliza, labele husu ba ema seluk atu responsabiliza. Segundu komandante ne’e afirma workshop ba selebrasaun loron mundiál feto ne’e, atu tau ideia no hanoin hamutuk hodi multipika no presiza habelár informasaun ba maluk sira seluk liu-liu iha PNTL. Workshop ne’e hetan aprezantasaun tematika sira hosi parte PDHJ, ne’ebé ko’alia kona-ba direitu umanu, UN WOMEN aprezenta matéria kona-ba sensibilizasaun jéneru, abordajen integradu jéneru, asédiu sexuál, komprimisu nasionál jéneru PAN-VBJ, VPU-PNTL ko’alia kona-ba lei kontra violénsia doméstika no violénsia bazea ba jéneru, DNPKK-MI halo aprezentasaun kona-ba PAN RKSNU 1325 kona-ba Feto, Paz no Seguransa, enkuantu parte hosi Saúde Rejionál RAEOA aprezenta matéria saúde reprodutiva no planeamentu familiár. Atividade refera hala’o tanba serbisu hamutuk entre Gabinete Jéneru PNTL ho TLPDP, UN WOMEN no Diresaun Nasional Prevensaun Konflitu Komunitáriu (DNPKK-MI) no hetan fundu hosi Japaun. Entretantu, marka prezensa iha workshop, Segundu Komandante PNTL, Komisáriu Faustino da Costa, Komandante Polisia RAEOA, Superientendente Arnaldo de Araújo, Jestora Progama UN WOMEN, Sra. Vicenta Maria Correia, no reprezentante TLPDP, Sra. Sandy Allan no partisipante sira hamutuk 100 kompostu hosi PNTL, bombeiros no mediadora DNPKK iha RAEOA. *CM*
