Sekretaria Estadu Komunikasaun Sosial (SECOM’S), liu husi Dirasaun Nasional Sentru Radio Komunidade (DNCRC), realiza seminariu internasional hamutuk ho orador nasional no internasional sira, hodi halibur idea no kria diskusaun ida klean konaba kondisaun radio komunidade ba futuru. seminariu ne’e hala’o iha Salaun João Paulo Comoro Dili. Kuarta 6 Maiu 2016.
Iha lia makloken, Sekretariu Estadu Komunikasaun Sosial Nelio Isaac hatete, “Ohin ita iha ne’e, atu identifika buat balu relasiona ho radio komunidade nia funsionamentu, ne’ebe tuir lei komunikasaun sosial ne’ebe aprova iha tinan kotuk, oinsa atu halo regulasaun ba radio komunidade nomos radio sira seluk. Regulasaun ne’e halo tanba, radio hirak ne’e, voluntariu no lukrutivu. Ne’e katak, laos halai liu ba komersial, maibe hare liu ba karater edukativu ba sidadaun sira hodi komprende. Seminariu ida ne’e mos esensial tebes hodi fo oportunidade ba governu, hamutuk ho kolaborador sira, atu komesa hahu halo no identifika ona buat balu, hodi komesa halo regulasaun ida, bazeia ba lei publikasaun artigu 23, ne’ebe hatudu ba ita atu tenki prepara.
Tanba ne’e, husu ba maluk sira, bele fo ita boot sira nia ideias tomak ba governu, atu oinsa halo lei ida ne’ebe fo fasilidade. Ita laos hanoin katak, regulamentu ne’e atu bandu funsionamentu jerais komunidade sira, maibe buka meius no solusaun ida ne’ebe diak, atu radio komunidade no radio sira seluk, bele halo sira nia knar profesional liutan, hodi ajuda ita nia prosesu dezenvolvimentu. Iha ne’e, ita mos hakarak agradese ba ita nia oradores internasional sira ne’ebe sei fo sira nia hanoin no esperiensia mai ita, atu oinsa ita bele fokus halo regulasaun ba radio komunidade, entermus de funsionamentu, karater no objetivu.
Entertantu tuir Diretur Nasional Sentru Radio Komunidade-Secom’s Sr. Luis Evaristo Soares, hatete, “Ho seminariu ida ne’e, bele fo hanoin ba ita nia maluk, alin no kolega sira ne’ebe durante ne’e servisu iha Radio Komunidade sira, atu bele servisu profesional liutan. Radio Komunidade tenki hato’o duni informasaun ne’ebe maka edukativu, Informadu nomos enterteinamentu ba anima komunidade sira.
Seminariu internasional ne’ebe hetan kooperasaun husi, Uniaun Europeia, Embaixada Portugal no Instituisaun Camões ne’e, involve, Prezidente Konsellu Radio Komunidade, Jestor Radio Komunidade, Oradores Internasional, Diretores, Segundu Vise Prezidente Parlamentu Nasional, nomos Ministru Administrasaun Estatal SE. Dionisio Babo, ne’ebe loke duni abertura ba seminariu ne’e. AX
