Dili- Iha loron Sesta feira ne’e (14/12), Funsionariu Ministeriu Interior halao reflesaun ho retiru, konvesa no Misa hamutuk hodi halo preparasaun simu prezensa Nain Jejus iha loron Natal no hafoun aan iha Tinan foun. Reflesaun ho tema “ Ho Ksolok Tebes Hasoru Kosok Oan Jesus no Agradese Nafatin ba Buat hotu iha moris ne’e”, hala’o iha salaun enkontru Ministeriu Interior Vila Verde. Iha liafuan badak, Diretora Geral Servisu Korporativu, Sra. Guilhermina F.S. Ribeiro hatete katak, reflesaun ida ne’e, ema hotu ne’ebe hamaham an iha Ministeriu Interior nia okos, bele prepara an simu Natal ho ksolok. “Iha ne’e, Ministeriu Interior abitua ona atividade ida ne’e, molok tama Natal sempre halo retiru, konfesa no misa hamutuk, hodi halo reflesaun hahu husi fulan Janeiru mai to’o Dezembru, atu fo perdua ba malu, tanba Natal lori dame no domin ba ema hotu. Loron Natal no Tinan Foun, iha tinan-tinan selebra, atu ema ida-idak halo reflesaun kona ba hahalok saida deit mak kontra ema seluk durante tinan ida nia laran tomak. Ho amu lulik nain rua, ne’ebe sempre marka prezensa, husu nafatin tulun mai ita hotu, atu nune’e, ita hotu ne’ebe hamaham an iha Ministeriu Interior nia okos, prepara an simu Natal ho ksolok. Amu Kapelaun PNTL Pe. Nelinho Americo. O’Carm, hateten katak, “Obrigado ba buat hotu neebe hatudu ona mai ami. Buat barak ita prepara ona maibe persija mos ita hotu nia klamar mos. Ami rua amu atu mai fahe mos esperiensia. Tanba palavras devina (Maromak nia liafuan) ita sei labaruk atu rona no hare. Mai ita halo reflesaun atu muda mentalidade aat ba moris dame, amizade no trankuilidade iha vida moris lor-loron nian. Obrigado ba konfiansa ne’ebe fo mai ami. Entertantu, Pe. Agus exposto. O’carm esplika katak, “Ema hotu ne’ebe Kristaun ka laos Krisaun hein festeja tempu ksolok ida ne’e. hanesan ema Kristaun ita tenke prepara an no fuan. Ita prepara buat luxu barak, maibe ita nia fuan triste hela. Tanba ne’e, ita persija hadia ita nia vida interior. Nia esplika tan, Se wainhira iha servisu fatin ida ne’e, maka hare malu matan lamos oinsa. Ita tenke hakribi hahalok ida ne’e. tanba laiha eru ruma ho modelu hanesan. Dalaruma karakteristika ema ida nian bele iha mudansa. Iha tempu adventu ita persija halo renovasaun. Tenke halo servisu ho professional no hadomi servisu ne’ebe ita halo. Atividade ne’e, hetan partisipasaun masimu husi funsionariu tomak ne’ebe hamahan an iha Ministeriu Interio nia okos. #Alan
