Dili- Inspetora Jeral ba Gabinete Inspeksaun no Auditoria (GIA), Sra. Candida do Rosaria da Costa Soares, partisipa iha seminar internasional iha ambitu komemorasaun loron internasional feto ba tinan 2019, ne’ebe organiza konjunta husi, Organizasaun Rede Feto, Grupo Mulher Parlamentar Timor –Leste (GMPTL), Movimentu Feto Foinsa’e (MOFFE), CAUCUS, no hetan apoiu fundus hosi Governu Japaun iha TL, KOICA no UNDP-TL (United Nations Development Programme). Seminariu ida ne’e ho tema ” Igualdade, Kualidade Inovativu ba Ema Hotu”, au mesmu tempu komemora mos ezistensia Rede Feto ne’ebe kompleta tinan 19, iha loron Kuarta feira ne’e, (13/03/2019) iha salaun Lalini Larigutu, edifisiu CNE (Comissão Nacional de Eleições) Colmera. Rede Feto rasik, hanesan organizasaun sumbrinha ba organizasaun feto hamutuk 32 iha Timor-Laran tomak, ne’ebe sempre valorize loron importante ida ne’e, hodi organiza sira nia membru tomak atu bele selebra loron konsagra ida ne’e ho objetivu atu bele refleta fila fali feto nia luta iha tempu pasadu no uza espiritu ida ne’e atu bele kombate problema ne’ebe feto maluk sira infrenta nomos atu promove igualdade jêneru no empoderamentu feto iha Timor-Leste. Semináriu internasionál ne’e hetan mós partisipasaun husi, espoza Prezidente Repúblika Timor-Leste, Sra. Cidalia Lopes Nobre, Prezidente Grupo Mulher Parlamentar Timor –Leste (GMPTL), Deputada Lidia Norberta, Xefe Jéneru PNTL Inspetora Polisia, Xefe Daria Ximenes, korpus diplomata, parseiru dezenvolvimentu sira, sivitas akadémiku nomos ONG nasional no internasional sira. #AX
