Dili, Sekretariu Estadu Protesaun Sivil, Dr. Alexandrinho Xavier Araujo, iha Tersa feira, 7 Maiu 2019 ne’e, hala’o konferensia imprensa ho jornalista sira iha Aeroporto Internasaional Nicolau Lobato, hodi informa konaba rezultadu reuniaun nivel alto Ministru Administrasaun Interna, ministrus do interior Comunidade dos Paises de Lingua Portuguesa (CPLP) ho nasaun membru sira iha Portugal no Cavo-Verde. “Hau reprezenta Ministru Interior hodi partisipa iha enkontru nivel alto Ministru Administrasaun Interna, ministrus do interior CPLP nian, hodi deskute kona-ba lasu amizade no kooperasaun no mós ba rezultadu di’ak hirak ne’ebé mak alkansa tiha ona, inklui kestaun hirak ne’ebe pertenente iha area Polisial, area Migrasaun nune’e mos iha area Protesaun Sivil no Bombeiros nian. Objetivu husi enkontru ida ne’e maka, hodi diskuti konaba asuntus kooperasaun entre nasaun membrus CPLP, hodi identifika topiku prinsipal balu nune’e bele fo benefisiu ba iha paizes membru CPLP nian nomos konaba saida maka problemas komum nian, hodi identifika no rezolve problema hirak ne’e,” dehan Sekretariu Estadu Protesaun Sivil, Dr. Alexandrinho Xavier Araujo, iha Aeroportu Internasional Nicolau Lobato Tersa, 7 Maiu 2019. Governante ne’e hatutan, Enkontru ida ne’e importante tebes tamba bele tau hamutuk hanoin iha parte legal nian konaba oin nusa atu servisu hamutuk fo protesaun ba vida humana nian. Entaun durante estadia iha ne’eba hau relata konaba situasaun faktual konaba dezastre no Migrsaun nian, em jeral ne’ebe ita nia nasaun hasoru, entaun Portugal prontu fo apoiu uluk ba area protesaun sivil Timor nian iha futuru, liu-liu konaba apoiu sokoruno eskola bombeiros nian. Setor sira ne’ebe involve an iha ne’e maka setor Protesaun Sivil, Setor Servisu Migrasaun no Setor husi Polisial nian ne’ebe mai husi nasaun sia. Maibe konaba area Servisu Migrasaun nian, sei hahu koalia fali iha tinan oin no sei hala’o iha nasaun membru Angola. Membru Governu ne’e relata mos katak, badadaun ne’e, estadus membrus sira bolu no buka malu hodi reforsa liutan kooperasaun iha ambitu polisia ninian, fahe mos responsabilidade husi nasaun membrus, karik iha kazu emerjensia ruma husi nasaun membru no atu fahe mos informasaun ba malu entre nasaun membru sira. Tanba ne’e, nia sei hakerek karta ba Autoridade Protesaun Sivil Portugal nian hodi koalia konaba areas saida maka Portugal atu fo apoiu. #AX
