Dili, Iha loron Kinta feira ne’e, Diretora Geral Servisu Korporativus Sra. Guilhermina F.S. Ribeiro hamutuk ho Diretora Nasional ba Prevensaun Konflitu Komunitaria Sra. Lidia Lopes Carvalho, nomos Xefi Departamentu Polisia Komunitaria, Superintendente Asistente Polisia, Antonio da Luz, hala’o enkontru hamutuk ho Embaxadora Nova Zelandia Sra. Vicky Barbara Poole ho nia komitiva, hodi halo diskusaun klean konaba planu prioridade ba Ofisial Polisia Suku (OPS) sira atu nune’e, bele halao knaar no servi komunidade sira halo prevensaun no atuasaun ba konflitu iha suku. Hafoin remata enkontru ne’e, embaixadora Nova Zelándia mai Timor-Leste, Sra. Vicki Poole, ba media sira hateten katak, “Ami hahu programa polisia komunitaria hahu iha tinan 2016, hodi serbisu hamutuk ho komunidade sira hodi hare ba implementasaun Polisiamentu Komunitaria. Programa ida ne’e, nia importansia maka, oinsa lori komunidade ho polisia sira atu serbisu hamutuk hodi hari konfiansa no fiar husi komunidade ba polisia. Ami serbisu hamutuk ho PNTL atu hasae sira nia kunesimentu iha area polisiamentu komunitaria no ami serbisu hamutuk mos parseria sira seluk. Nia hatutan, “Iha enkontru ida ohin ne’e oinsa atu ami diskuti hamutuk kona ba relatoriu ba iha implementasaun tinan 2018 nian progresu sira nebe atinji ona iha tinan kotuk liu-liu hare serbisu balun ne’ebe mak ami halo. Hanesan Governu Nova Zelandia apoiu ona ba Governo Timor-Leste liu husi PNTL ami implementa uma ba Ofisial Polisia Suku (OPS), hamutuk uma sanulu resin hat (14) sai hanesan modelu ida ba iha Governu Timor-Leste. Dehan Embaixadora Nova Zelándia mai Timor-Leste, Vicki Poole, iha Sala Inkontru Ministério da Defesa, Fatuhada Dili. Entertantu, Xefe Departamentu Polisia Komunitaria, Superintendente Asistente Polisia, Antonio da Luz hatete katak, “Oohin koalia kona ba apoiu sira nebe mak durante ne’e Governu Nova Zelandia liu husi Polisia Nova Zelandia ho The Asia Foundation oinsa mak atu dezenvolve polisia komunitaria iha Timor-Leste. Husi enkontru ida ne’e, atu hare no define fali politika ida ne’ebe diak, atu bele suporta Polisia Nasional Timor-Leste hodi dezenvolve diak liu Polisia komunitaria nian iha futuru oin mai. Xefe Departamentu Polisia Komunitaria ne’e mos akresenta tan katak, Iha formasaun sira ne’e materia Polisia Komunitaria aumenta tan orario no mos aumenta tan materia sira neebe mak relevante tebes ba serbisu polisia komunitaria nian, ohin ami aprezenta ituan oinsa mak atu bele integra materia polisia komunitaria ninian iha formasaun oin mai kona ba kursu formasaun ofisiais sira nian hanesan kursus ba inspetur, tanba ofisiais sira ne’e wainhira remata formasaun sira mos sei koloka balu hanesan mos komandante Skuadra no balu mos hanesan komandante seksaun, entaun sira tenki hatene serbisu Polisia Komunitaria nian iha futuru oin mai, tanba ita estabelese ona iha baze hanesan Ofisial Polisia Suku nomos Konsellu Polisia Komunitaria. Entaun sira hanesan komandante tenki iha kuinesimentu diak kona ba papel hirak ne’e. Wainhira sira fo orientasaun ba iha membru balu, sira bele hatene ona membru sira nia knar serbisu iha baze”. Katak xefe departamentu ne’e ba jornalista sira iha Sala Inkontru Ministério da Defesa, Fatuhada
SRP husu kona ba wainhira estabelese ona Polisia Komunitaria no Ofisial Polisia Suku sira, maibe konflitu balu kontinua mosu, Xefi Departamentu Polisia Komunitaria ne’e komenta katak, “ida ne’e presija ema hotu nia koperasaun. Mesmu ita estabelese ona Polisiamentu Komunitaria maibe presija mos komunidade hotu nia kontribuisaun. Wainhira iha problema ruma lalais informa ba iha polisiamentu komunitaria ka OPS sira, atu bele buka solusaun hodi rezolve. Karik akontese problema mak laiha apoiu husi komunidade hodi informa situasaun sira ne’e, oinsa ita atu buka solusaun ba resolve. Persiza hatene katak, seguransa ne’e iha ita hotu nia liman, entaun sei iha ita hotu nia liman presija ema hotu nia kontribuisaun atu bele informa, atu bele buka solusaun hodi rejolve problema tanba ne’e mak husu ba komunidade hotu atu bele kontribui ba iha asuntu seguransa sira, ita bele estabele ita nia sistema nebe diak iha konsellu polisiamentu komuniitaria, koloka OPS iha suku sira, maibe ita laiha koperasaun diak ho sira oinsa mak ita bele ajuda rejolve problema, buat sira ne’e hotu preija ema hotu sira nia tulun ema hotu nia koperasaun atu bele apoiu oinsa mak atu halo prevensaun ba problema sira ne’e. Tenik Komandante Antonio da Luz. #Dom
