Dili-Diresaun Jeral Finansas Estadu liu husi Diresaun Nasional Jestaun Fornesementu Patrimoniu Estadu no Gabinete ba Inspesaun no Auditoria, iha tersa feira ne’e, (19/03/2019), hala’o inpesaun fizika no taka adezivu (stiker) ba kareta no motor iha resintu Ministeriu Interior (MI). Inspesaun ne’e parte ida husi servisu sentral Ministeriu Finansas nian hodi sertifika kondisaun kareta no atu hadia performa governasaun nebe orienta ba transparansia no boa governasaun patrimóniu Estadu Timor-Leste nian. Diretor Nasional Logistika Sr. Mariano de Araujo konsidera inspesaun ida ne’e importante tebes, hodi kompelta dadus ne’ebe iha no husu atu halo ba to’o iha munisipiu sira seluk. “objetivu fundamental husi inpesaun ne’e, maka atu hare asuntu importante rua. Ida maka, atu hare konaba baze de dadus ba uzu veikulu tomak ne’ebe rejista iha ne’e. nune’e bele mantein nia efisiente no efikaz ba prosedimentu jestaun patramoniu atu rejistu. Ida seluk maka atu hare kondisaun fizika veikulu sira ne’ebe integra iha Ministeriu Interior tomak”.
Nia esplika, total veikulu ne’ebe ohin inspesiona maka kareta hamutuk 109 ho nia tipu Prado, Hilux, Triton no camioneta ida. No sei kontinua ho motorizada hamutuk 188 ho nia tipu hanesan Honda Supra-X nomos Honda Mega Pro. Nia hatutan, alende halo inspesaun fiziku no dokumentus kareta nian, taka mos stiker ba kareta estadu hirak ne’e, nune’e bele nafatin iha kontrola no sira bele halo relatóriu ba tipu patramoniu hotu hotu nia klase no kategoria iha Ministeriu ne’e rasik. Nia konsidera, inspesaun ida ne’e importante tebes, no husu atu halo ba to’o iha munisipiu sira seluk. “Hau hanoin sistema kontrola ida ne’e, importante tebes, se bele karik halo ba to’o iha instituisaun estadu sira ne’ebe maka tutela ba Ministeriu Interior nia okos, liu-liu iha munisipiu sira seluk. Nune’e, karik identifika buat balu bele rekomenda ba halo manutensaun no bele hamenus kustu manutensaun kareta no motor. Tanba Ohin iha inspesaun ne’e notifika kareta balu para deit. Ida ne’e, ami sei rekomenda atu hodi ba iha ofisina patrimoniu estadu nian atu hadia.” nia fo hanoin. #AX
