Ohin Kinta-feira, 13 Dezembru 2018, Ministru Defeza no Ministru Interior Interinu Brigadeiru-Jeneral (Ref) Filomeno da Paixão de Jesus simu inkontru kortezia husi Embaixador Xina mai Timor – Leste Dr. Xiao Jiangou, iha nia knaar fatin Ministériu Defeza, Fatuhada Dili. Iha inkontru ne’e Embaixador agradese tebes koperasaun defeza ne’ebé diak entre Timor-Leste ho Xina. Embaixador koalia kona-bá programa treinamentu ba F-FDTL no PNTL. Embaixador reitera kompromisu nia país atu hametin liután koperasaun defeza ho Timor-Leste. Ministru Defeza agradese ba parseria diak ne’e no vontade Xina nian hodi kontinua hametin liután koperasaun defeza no seguransa ho Timor-Leste. Ministru mos partilha ho Embaixador kona-bá prioridade governu atual kona-bá seguransa marítima nian, no reitera kompromisu governu Timor-Leste hodi hametin liután koperasaun bilateral iha área defeza entre país rua. Ministru Defeza no Embaixador mos konkorda katak parte rua Timor-Leste no Xina presiza finaliza lalais Memorando de Entendimento iha área defeza, hodi nune’e bele hametin no regulariza liután koperasaun iha setor defeza entre país parseiru rua ne’e.
