Dili-Iha loron Segunda Feira ne’e, 29 Abril 2019, Bazeia ba Lei Migrasaun no Azilu numeru 9/2003 no 11/2017, Komandante Sektor Operasaun, Divizaun Kontrolu no Monitorizasaun , Inspetur Polisia Fortunato Fausto Guterres, hamutuk ho nia membru hala’o inspesaun ba kompañia China Harbor Engineering Company Ltd, ne’ebe hala’o hela obra ba konstrusaun portu Tibar. Hafoin remata inspesaun, Komandante Sektor Operasaun husi Diresaun Geral Servisu Migrasaun, inspetur polisia, Inspetur Polisia Fortunato Fausto Guterres, ba media sira hateten katak, inspesaun ne’e konsege detekta sidadaun estranjeiru balu viola lei Migrasaun nian.
“Ami mai iha ne’e hala’o inspesaun ba sidadaun estrangeru, ne’ebe servisu iha konstrusaun Portu Tibar. Entaun hanesan autoridade seguransa ba serbisu migrasaun ninian. Ami iha obrigasaun atu halo monitorizasaun ba sidadaun hirak ne’e nia dokumentu ne’ebe tuir duni rekezitus ba serbisu profisionais ka lae. Dokumentu hirak ne’e maka hanesan pasaporte nomos vistu traballu. Iha inspesaun ne’e, ita nota katak, iha grupu tolu mak hala’o serbisu ba obra ne’e, hanesan grupu ida halo Drainagens, ida halo Main office no seluk halo Konstrusaun ho total traballador estranjeru hamutuk ema nain 100 resin”. Husi ema atus ida resin ne’e, iha traballador balun mak viola vistu traballu, iha balun mak viola lei Migrasaun no Azilo, balun mos viola ona lei SEFOPE ninan no SEFOPE mai ona, tan ne’e ohin parte imigrasaun mai iha ne’e, atu konfirma fila – fali dadus ne’ebe sira hato’o ba parte imigrasaun. Komandante Operasaun ne’e afirmatan tan katak, “Mesmu Governu Timor-Leste maka kontrata sidadaun sira ne’e, hodi servisu ba interese nasional, maibé hanesan seguransa nasaun ninian, membru Migrasaun sei kontinua fiskaliza bazeia ba lei Migrasaun ne’ebe ita nia estadu no nasaun rasik iha. #Luis
