Balibo Sábadu, Loron 27 Fulan Abril tinan 2019, Ministru Defeza no Ministru Interior Interinu Brigadeiru Jenerál (Ref) Filomeno da Paixão de Jesus ho komitiva hala’o vizita de trabalho ba postu Polisia Nasional Timor-Leste-Unidade Patrolhamentu Fronteira (PNTL-UPF) iha Companhia Charly F-FDTL, Kompanhia Alfa Tunubibi, Nunura, Leohitu, Derokren, Badut Mean, Postu Integradu Batugade Mota Ain no Nu’u Badak. Iha vizita ne’e, Governante VIII Governu konstitusional hakarak hare direitamente kondisoens ne’ebe polisia unidade patrolhamentu fronteira sira infrenta iha terenu. Iha loron hanesan governante ne’e la konsege to’o iha postu UPF Cova tanba kondisaun Estrada ne’ebe ladiak maibe, governante ne’e informa ba media iha entervista katak sei buka tempu hodi too iha ne’eba, no iha tempu badak sei halao vizita ne’ebe hanesan ba postu PNTL-UPF iha Oecusse. Iha okaziaun ne’e, Ministru Interior Interinu informa konaba kondisoens ne’ebe relata no hato’o husi komandante sira no sei sai hanesan sasukat ida atu bele tetu hamutuk hodi solusiona problema sira ne’ebe mak UPF infrenta iha terenu. Konaba Servisu parte Migrasaun nian iha Batugade Motain, Governante ne’e informa katak, ohin “hau halo ona enkontru badak ida ho komandante postu Motain iha minutu balun deit atu fó hanoin konaba servisu hotu tenki lao ho regra no ordem”, ordem mak sai hanesan regulador atu regula servisu hotu. #Fati#
