Bobonaro, Loron 26 fulan Abril tinan 2019, Ministru Defeza e Ministru Interior Interino DR. Filomeno da Paixão de Jesus, akompanha husi Xefe Gabinete Maria Helena Almeida de Jesus no Xefe Gabinete Minsteriu Defeza hala’o vizita de trabalho iha Postu Unidade Patrollamentu Fronteira (UPF) Alto Lebos, Kompanhia Alfa Postu Bobonaro, Postu Calohan Sede Nurep Saburai Zona Maliana no Postu UPF Memo. Iha fatin no loron hanesan, Ministru Interior Interinu hamutuk ho komitiva hala’o mos vizita iha Postu UPF Lela, Administrativu Maucatar no Postu UPF Fatululik. Durante hala’o vizita iha postu UPF Fatululik, Xefe Suku no komunidade sira hato’o rekomendasoens ba membru VIII Governu Konstitusional ne’e, atu bele harii Postu Integradu ida iha Dátomi ne’ebe baliza entre nasaun Timor-Leste ho Indonezia tanba rai fuik tebes. Iha enkontru badak ne’e, autoridade lokal no komunidade sira sujere ba Governante VIII Governu konstitusional nee atu bele aumenta tan membru UPF balun hodi reforsa membru sira bainhira servisu hodi asegura seguransa iha baliza nasaun RDTL nian. Hafoin enkontru ne’e remata, Ministru Defeza no Ministru Interior Interinu hamutuk ho komitiva kontinua halao vizita iha postu Kompanhia Alfa Unidade Patrollamentu Fronteira (UPF) inklui mos postu sira seluk ne’ebe pertense ba Munisipiu Bobonaro nian hodi hare kondisoens membru UPF sira iha terenu. Vizita ida ne’e hanesan vizita dahuluk ne’ebe hala’o husi Ministru Defeza no Ministru Interior Interinu hafoin simu orientasaun husi Xefe Governu Konstitusional Taur Matan Ruak. #Fati#
