Sesta Feira, Loron 10 fulan Maiu tinan 2019, Ministru Interior Interinu Brigadeiru Jenerál (Ref) Filomeno da Paixão de Jesus, ofisialmente entrega sertifikadu ba estudantes estajiarius nain 5 husi Universidade Nasional Timor-Lorosae (UNTL) Fakuldade Siensia Sosiais, Departamentu Relasoens Internasionais ne’ebe durante fulan 2 hala’o estajiu iha Gabinete Ministru Interior no Gabinete de Asesoria. Iha biban ne’e Ministru Interior Interinu sente ksolok ho prezensa estudante Universidade Nasional Timor Lorosae (UNTL) ne’ebe fó ona kontribuisaun no servisu durante fulan rua nia laran hodi apoiu Ministeriu interior. Governante VIII Governu Konstitusional ne’e salienta katak “hau mos mai husi Universidade Nasional Timor-Lorosae (UNTL), imi mak jerasaun patriota ba nasaun ida ne’e, nasaun ne’e presija imi nia kontribuisaun ba dezenvolvimentu nasional, imi mos jerasaun diplomata ne’ebe nasaun ne’e presija. odamatan Gabinete Ministru nian loke ba imi bainhira presija buat ruma hodi kompleta imi nia teze.” Iha biban ne’e Xefe Kordenador UNTL, Luis Garcia dos Santos sente kontente tanba bele aprende servisu prátika iha area media ninian, “oinsa halo kobertura, halo notisia tuir kodegu jornalista nian, oinsa servisu iha area protokolu, oinsa halo atendimentu públiku konaba karta entrada no saida ninian”. Kordenador ne’e salienta katak, Durante ne’e ami nia kolega balun mos koloka ba iha Diresaun Jeral Servisu Migrasaun, Diresaun Nasional Prevensaun Konflitus Komunitaria. iha ne’e, ami pratika aumezmu tempu ami mos aprende konaba oinsa halo diálogu ho komunidade sira ne’ebe hasoru konflitu. Durante estajiu ami mos hetan materia lubuk ida ne’ebe mak ami labele hetan entermus de siensia no teoria deit. Tan ne’e maka ami sente kontente teb-tebes. “ami bele halao estajiu iha ne’e hanesan ajente futuru estadu nian, ami mos bele intende ona prosesu sira iha administrasaun públika ninian”. Iha futuru ami labele iha komplikadu tanba ami iha ona koñesimentu. “Futuru Ministeriu no nasaun ida ne’e iha ami nia liman hanesan estafeta ba nasaun ne’e nian. Ami nia esperansa katak ita nia hamutuk ho loron ne’ebe oituan deit mas, ami aprende buat barak husi funsionariu sira iha Ministeriu ida ne’e”. #Fati#
