Suai-Iha loron Kinta- Feira ne’e 25 Abril 2019, Ministru Defeza no Ministru Interior Interino DR. Filomeno da Paixão de Jesus akompaña husi Komandante Interino UPF, Superintendente polisia João Sancho Pires no Xefe Gabinete Ministru Interior, hala’o vizita servisu ba Postu Integradu UPF (Unidade Patrullamentu Fronteira) hanesan postu Salele, Mota Masin, Tilomar, Wala Lama, Foholulik, Aikakar, Belulik Kraik, Belulik Leten Fatumea no Postu Aeroportu Suai Munisipiu Covalima. Vizita traballu ne’e nia objetivu maka atu hakbesik a’an hodi hare kondisaun membru Unidade Polisia Fronteira no mos membru F-FDTL iha postu integradu sira iha fronteira. Durante vizita Governante VIII Governu Konstitusional nee hare no observa konaba servisu membrus UPF sira nian no kondisaun dormitoriu, casa de banho, elektrisidade, Be’e mo’os no fatin koziña nian. Entertantu iha Postu UPF Belulik Kraik, durante ne’e membru sira hala’o servisu laiha elektrisidade, mesmu antes ne’e iha duni solar panel maibe dadaun ne’e avaria hela. Entaun hanesan polisia ne’ebe treinadu sira ho profisional halao nafatin sira nia knar nudar seguransa nasaun tuir moto ne’ebe sira hanaran “Hau nia sakrifisiu mak dedikasaun ba Estadu”. Alende ne’e, Iha postu UPF Belulik Leten, ne’ebe lokaliza iha area Postu Administrativu Fatumea, membru UPF sira informa ba Governante VIII Governu Konstitusional ne’e katak, susar tebes atu asesu ba be’e mo’os no sira tenke obrigadu kria kondisaun rasik hodi lao ho distansia neebe dok hodi hetan be mos. Hafoin remata iha postu Belulik Leten, Ministru Defesa no Ministru Interior Interino hamutuk ho komitiva sira halao mos vizita ba iha Postu Integradu UPF Aeroportu Suai, hodi hare no observa kondisoens servisu ne’ebe unidade Polisia Fronteira no Polisia Servisu Migrasaun sira hala’o iha terenu. Ministru Interior interinu mos kontinua vizita ba Postu Integradu Foholulik. Iha postu ida ne’e iha mos membru UPF feto ida ne’ebe mak dadaun ne’e, hala’o hela knar hanesan servidores estadu hodi asegura seguransa iha area Fronteiras. #Fati
