Dili-Ministru Interior Interinu Brigaderu Jeneral (Ref) Filomeno Paixão de Jesus, hala’o konferensia emprensa hodi informa konaba lamentasaun no keixas husi sidadaun estranjeiru hasoru membru balu ne’ebe halo kobransa ilegal. ”Hanesan Ministru Interior, ohin hau konvida jornalista sira mai iha nee, atu informa katak, ikus-ikus ne’e, iha keixa barak no mosu lamentasaun mai husi sidadaun estranjeiru ne’ebe tama iha Timor. Sidadaun estranjeiru sira ne’e, fo hatene mai hau liu husi karta eskrita nomos iha balu informa verbalmente katak, iha ajente migrasaun balu halo kobransa ilegal liu-liu ba sira iha fatin Aeroporto nomos postu fronteira sira. dehan Ministru Defeza ba jornalista sira iha loron Kinta feira ne’e, (11/04/2019) iha salaun enkontru Ministru Defeza Fatuhada. Iha okajiaun ne’e atual Ministru Defeza ne’e mos fahe numeru kontatu ofisial Ministru Defeza nian ba publiku sira hodi bele hato’o keixa ruma ligadu ho kobransa ilegal. “Aproveita oportunidade ida ne’e, ohin hau hakarak fo hatene ba populasaun tomak ka sidadaun estranjeiru sira ne’ebe maka tama mai teritoriu nasional Timor-Leste, karik iha ema ruma maka husu osan ba imi latuir regulamentu ne’ebe maka estabelese ona tuir lei Republika Demokratika Timor-Leste nian, husu atu avontade kontatu hau, ka fo hatene mai hau diretamente liu husi telfone ho numeru 78326687 ida fali tan maka 77172992 atu hau bele hola asaun. Ministru Interior interinu ne’e afirma tan katak “Hau simu informasaun katak, membru balu husu osan $200.00 ba ema estranjeiru sira ne’ebe mai hanesan turista maibe hakarak buka fali servisu. Entaun ho informasaun hirak ne’e, tenke para. Liu-liu iha Aeroportu Dili nomos iha postu Batugade. Hau bolu ona Diretor Geral Servisu Migrasaun atu bolu atensaun hodi akaba ona kobransa ilegal ne’e iha Timor. Portantu ita iha lei nomos regras, entaun hau sei aplika medidas ne’ebe lei haruka.” Tuir atual Ministru Defeza ne’e katak, nia simu keixa balu konaba kobransa ilegal ne’ebe halo husi ajente Servisu Migrasaun balu tanba sira sente sai prejudikadu ba kobransa ilegal ne’e. Nia la konsege fo sai naran husi parte ne’ebe hato’o keixa, tanba sei iha prosesu estudu ba iha keixa ne’ebe hatama. #AX
