Dili-Ministru Interior Interinu Brigadeiru Jenerál (Ref) Filomeno da Paixão de Jesus, Segunda-Feira ne’e 6 Maiu 2019, diriji serimonia isar bandeira nasional, ne’ebe maka hala’o iha resintu Ministeriu Interior Vila-Verde. Iha diskursu Ministru Interior Interinu Brigadeiru Jenerál (Ref) Filomeno da Paixão de Jesus husu ba funsionariu sira atu servisu tuir regra no hatudu imparsialidade no transparensia iha fatin servisu. “Ha’u husu ba imi hotu tantu husi Diretores Jerais, Nasionais, Xefi Departamentus, funsionarius sira atu serve ho diak administrasaun públika. Tanba funsionariu ne’e hanesan makina estadu Timor Leste ninian, entaun servisu tenki tuir Prinsipiu Jeral Administrasaun Públiku ninian, se servisu la kumpri regra diak liu sai. Ne’e duni servisu tuir regra labele inklina ba intrese pesoal maibe hatudu imparsialidade no transparensia”. Nia hatutan, “Husu mos ba parte logistika no prokurament nomos diresoens hotu tenke responsabilidade ba servisu hotu ho imparsialidade no transparensia totalmente. Hare kontrola distribuisaun transporte estadu nian tenki tuir lei, tanba wainhira sala utiliza, hau mak sei ba hatan iha deputadu no tribunal sira. Tanba ne’e hau husu distribusaun tenki tuir lei, labele distribui tuir imi nia hakarak deit”. Governante ne’e afirma tan, “Ba parte Diresaun Nasional Finansas, Ministeriu Interior hanesan instituisaun ida ne’ebe atende povu ho karater urjente iha situasaun ida nia laran. Sekarik diresoens tutelas sira entrega CPV (Certificate and Payment Voucher) tarde, lalika hein malu selae bele prejudika fali ema seluk nia direitu nomos servisu seluk ne’ebe urjente. Dala barak, funsionariu sub-ordinadu sira halo servisu lalos tanba diretor no xefi departamentu mak lalos, regra husi Komisaun Funsaun Públika klaru tiha ona maibe falha husi implementador sira, karik funsionariu ida sala prosesa tuir lei ne’ebe komisaun estabelese ona, lalika tetu tun, tetu sae, selae funsionariu ne’e abitua ona ho hahalok ne’ebe sira halo. Maibe importante liu maka tenke disiplina, respeita hirarkia, halo servisu ho didiak, buka atu servisu hamutuk hodi tulun Ministeriu ida ne’e lao ba oin. Atual Ministru Defeza ne’e hatutan, “Ba parte Rekursu humanu, lista prezensa Isar Bandeira Nasional tau iha Gabinete Ministru nia fatin tuir orariu servisu normal nian ne’ebe fo sai ona husi Komisaun Funsaun Públika, laiha kargus diresaun no xefia inklui funsionariu ida mak servisu tama no sai tuir nia hakarak iha oras servisu nian, ba funsionariu publiku sira ne’ebe la hola parte iha Serimonia Isar Bandeira Nasional kada fulan liu-liu iha loron ida ohin. Tanba ne’e, kontinua kaer metin disiplina, respeita malu, hare malu hanesan kolega servisu, lalika buka hatun malu, lalika buka estraga malu, kumpri ita nia dever, presta ita nia servisu sai diak liu tan atu nune’e povu bele sente imi nia prestasaun servisu. Tenik eis Brigadeiru Jenerál ne’e. #Fati
