Dili-Diretora Geral Servisu Korporativu Sra. Guilhermina F.S. Ribeiro, hamutuk ho Diretor Geral Servisu Operasionais Sr. Domingos Pinto, partisipa lansamentu “Chatbot Rosa”, iha salaun auditoriu Xanana Gusmão Ministeriu Finansas Aitarak Laran. Chat bot Rosa ne’e, hanesan mekanismu inovativu iha administrasaun públiku iha Timor-Leste, ne’ebe dezenvolve husi Comissão da Função Pública (CFP), servisu hamutuk ho UN Woman no Juridiku Sosial (JU’S). Chat Bot ne’e rasik nia objetivu maka atu simu keixa online konaba asediu seksual neebe komete husi funsionariu publiku sira. Ho mekanismu ida nee, bele rekolha informasaun husi entidades hotu no sei rejista keixa formal ida nee hodi hahu loke lalaok disiplinar. Ho instrumentu ida nee bele promove asesu luan ba servisu KFP nian hodi rekolha informasaun husi funsionariu publiku sira. Seremonia lansamentu nee, hetan mos partisipasaun husi Presidente Komisaun Funsaun Públiku Sr. Faustino Cardoso, Sekretária Estadu ba Igualdade no Inkluzaun Sra. Maria José da Fonseca Monteiro de Jesus, Country Representative UN Women iha Timor-Leste, Diretores Nasional sira, pontu fokal ba asuntu jeneru, reprezentante Suku, parseria internasional nomos parseru sosiedade sivil sira. #AX
