Dili- Komandante Xefi Sektor Operasaun Servisu Migrasaun, Inspetor Polisia Fortunato Guterres iha segunda feira ne’e, (3/12) hamutuk ho Adidu Migrasaun husi KBRI (Kedutaan Besar Republik Indonesia) mai Timor-Leste, Sr. Eben Rizky, hala’o enkontru ho sidadaun estranjeiru husi Indonezia, ne’ebe durante ne’e hela ona iha Timor-Leste durante tinan barak nia laran. Objetivu husi vizita ida ne’e, atu fahe informasaun ba sidadaun estranjeiru sira ne’ebe maka halo kazamentu mistu no husu pedidu atu sai sidadaun Timor, nomos ba sira balu ne’ebe maka hela ona iha Timor durante tinan barak nia laran. Iha enkontru ne’e, Sr. Eben Rizky, nudar Adidu Migrasaun husi KBRI hateten katak, atu hela iha Timor-Leste tenke hetan lai autorizasaun rezidensia. “Agradese tebes ba ita nia sorumutu ida ne’e. iha ne’e, hau atu dehan katak, “wainhira ita dehan katak, ita hanesan sidadaun Indonezia ne’ebe maka hela iha ema nia rai hanesan Timor-Leste, primeiru ita tenke trata uluk lai autorizasaun rezidensia. Atu hetan ida ne’e, tenke iha uluk lai, KTP, akte kelahiran no kartu keluarga tanba ida ne’e maka kriteria atu hetan pasaporte. Maibe sai kestaun maka ne’e, sidadaun barak maka hela Timor-Leste laiha relasaun. Hau hanoin Servisu Migrasaun Timor-Leste sei la servisu mesak, ami sei servisu hamutuk, envolve mos entidades balu inklui departamentu ne’ebe ligadu ho asuntu ne’e.Fiar katak hau sei lori problema ida nee rezolve lalais. Tanba ne’e, husu mos ba estadu Timor-Leste nia apoiu atu ita bot sira ne’ebe kazamentu mistu ne’e, bele halo pedidu hodi sai hanesan sidadaun Timor oan. Entertantu, Komandante Xefi Sektor Operasaun Servisu Migrasaun, Inspetor Polisia Fortunato Guterres hateten katak, “Atu sai sidadaun Timor-Leste, tenke tuir prosedimentu ne’ebe vigora. Iha ne’e solusuan rua deit, entre ita bot sira tenke tuir konkursu atu sai sidadania no kumpri regra iha nasaun ne’e, selae haruka fila ba Indonezia. Atu aplika ba ida ne’e, ita bot sira tenke iha pasaporte, deklarasaun Xefi Suku no kartaun Bom Kompartamentu. Tanba ne’e mak ami konvida adidu Migrasaun husi Indonezia mai iha ne’e, atu esplika ba ita boot sira. Ba labarik sira ne’ebe moris iha nasaun RDTL, lei fo dalan automatikamentu sai sidadaun Timor. Karik iha duvidas ruma husu atu ita bele fo hanoin ba malu. Hodi nune’e, labele iha tan problema iha loron ikus no labele viola regra iha nasaun ne’e. ami iha ne’e, laos atu foti desijaun final, maibe ami iha ne’e atu hala’o deit servisu tuir lei. #Alan
