Maibisse- Iha loron, 25 Novembru 2018, Diretora Nasional ba Diresaun Nasional Prevensaun Konflitu Komunitaria (DNPKK), Sra. Lidia Lopes de Carvalho hamutuk ho komitiva husi Ministeriu Interior, partisipa abertura kampanha loron 16 ativismu kontra violensia hasoru feto no labarik feto, ho tema “Hapara forma Violensia oin-oin hasoru feto no hatete lae ba violensia hasoru feto no Labarik feto”. Abertura ne’e hala’o iha Postu administrativu Maubisse Munisipiu Ainaro. Ba tinan 2018, atividade kampanha loron 16 ativismu kontra violensia hasoru feto no labarik feto, organiza husi Sekretaria Estadu Inkluzaun Sosial (SEII), no abertura hahu loron ohin, iha Maubisse, no kontinausaun iha Nivel Munisipiu sira. Ita hotu-hotu hatene katak, durante loron 16 komesa husi 25 Novembru to’o 10 Dezembru, nasaun hotu-hotu halo atividade oin-oin atu bele haberan informasaun no hametin komunidade sira atu bele kombate violensia kontra feto no labarik. Loron ativismu ida ne’e hahu husi loron 25 Novembru ne’ebe mundu konese hanesan Loron Internasional Eliminasaun Violensia Kontra Feto iha mundu tomak no sai hanesan loron importante ba ita hotu atu bele konkritiza liu-tan ita nia komitmentu ba harii paz iha ita nia familia, ita nia komunidade no ita nia nasaun. Hamutuk iha sosiedade international iha Loron Eliminasaun Violensia Hasoru Feto, 25 Novembru mai ita hotu hatudu asaun ida hodi bele harii relasaun saudavel, no respeitu ita nia parseiru no membru familia sira. #Gina
