Segunda-Feira (20/04/2015), Ministru Interior, DR. Longuinhos Monteiro, akompanha husi Vice Ministro dos Ministério dos Negócios Estrangeiros Sr. Roberto Soares, hala’o reuniaun ho Komando Jeral, Polisia Nasional Timor-Leste (PNTL), parseirus sira, embaixadores, misoens diplomatiku, nomos ajensia internasional sira hotu, hodi koalia konaba situasaun seguransa iha ita nia rai laran. Reuniaun ne’e hala’o iha Quartel Geral PNTL Caicoli-Dili.
Objetivu husi enkontru ida ne’e maka, atu atualiza informasaun ba ita nia parseiru sira liu-liu ba korpus diplomatiku sira, ne’ebe toma konta konaba kestaun seguransa nian iha ita nia rai. Enkontru ida ne’e ita bolu dehan General Diplomatic Security Briefing, ho nia objetivu maka atu atualiza situasaun seguransa iha ita nia rai laran. Ita hotu hatene katak, hahu iha inisiu tinan ida ne’e, ita iha situasaun ida ne’ebe halo ema balu hanoin katak ita nia situasaun seguransa la konsege normaliza fila fali hanesan uluk. Entaun liu husi briefing ida ne’e, atu atualiza ba asira katak, em jeral, situasaun politika no seguransa iha ita nia rai laran la’o diak tebes. Hatete Vice Ministro dos Ministério dos Negócios Estrangeiros Sr. Roberto Soares, ba jornalista sira depois remata enkontru ne’e.
Tanba ida ne’e, ohin dader ne’e, nia pontu jeral ne’ebe maka ita hato’o ba ita nia parseirus, embaixador, misoens diplomatiku, ajensia internasional sira hotu, konaba situasaun seguransa ne’ebe maka ita nia operasaun HANITA halo iha area ponta leste nian.
Ohin iha ne’e mos, ami aprezenta ona saida maka akontese durante loron 30 nia laran, husi 21 Marsu to’o 21 Abril aban kompleta 30 dias. Ohin ita nia Ministru Interior atualiza katak, ita nia aproximasaun ne’ebemaka itahala’o, hodi responde ba rezolusaun ne’ebe maka estabelese konaba kestaun seguransa nian.
Informa mos katak iha operasaun ne’ebe maka hala’o husi ita nia forsa rua F-FDTL ho PNTL ne’e konsege hetan kooperasaun husi ita nia elementus sira ne’ebe maka konsidera iha ligasaun ho grupo Mauk Moruk no lori ona sira ba tribunal atu responde sira nia aktus. Nune’e, ohin Ministru Interior mos aprezenta katak, iha desizaun para bele kontinua nafatin operasaun ne’e, no ambitu atu asegura diak liu tan ita nia situasaun seguransa no estabilidade em jeral.
Aproveita oportunidade ida ne’e, hau mos atu informa ba sira katak, wainhira halo sira nia movimentasaunba ita nia teritoriu rai laran, ou karik sira iha servisu hamutuk ho ajensia internasionais, NGO internasionais balu, sira iha obrigasaun atu atualiza informasaunho ita.
Ikus liu, atu informa ba ita nia maluk sira ne’ebe husi rai liur tama mai ita nia rai, husu para atu tuir prosedementus legais ne’ebe iha ita nia rai. Sira mai labele halo atividade ilegal, karik tama mai tenki aprezenta an tuir regras imigrasaun nian ne’ebe aplika. Hanesan sira mai ne’e, hanesan turista ka, atividade servisu ka, hala’o bisnis ka hotu-hotu iha obrigasaun atu halao tuir lei no obrigasaun ne’ebe makaeziste ona iha ita nia rai. AX
