Ainaro-Iha Kuarta feira ne’e, loron 29 Abril 2015, Komisaun Funsaun Publika (KFP) fo tan pose ba emposadus Ministerio do Interior nian, hamutuk ema nain 96, kompostu husi Diresaun Nasional Seguransa Patrimoniu Publiku (DNSPP) ema nain 71, Diresaun Nasional Protesaun Civil (DNPC) ema nain 18 no Diresaun Nasional Prevensaun Konflitu Komunitaria (DNPKK) ema nain 3. Seremonia asina termu de aseitasaun ne’e, hala’o iha sala enkontru administrasaun munisipiu Ainaro, Suku Ainaro.
Iha abertura ba seremonia asina termu de aseitasaun ne’e, Diretora Geral KFP hatete ba emposadus sira, “Kualidade servisu lamai husi ema matenek deit, maibe kualidade servisu mai husi Boa Vontade (dedika an duni) no Boa Fe (servisu fo laran) nebe mai husi ema ne’ebe hakarak kontribui ba ita nia rai. Valor ne’e mai husi ema nebe iha kraik, Ema bot forsa iha leten nemos tanba iha kraik ne forsa. Ema ida-idak ho nia profisaun. Iha administrasaun ita iha rejimi kareira rua, ida maka rejimi jeral, ida seluk maka rejimi spesial ne’ebe fo ba profesor no mediku sira, maibe aban bairua mos sei fo ba ema sira ne’ebe servisu ho riskus, maibe ita sei halo estudu ba ida ne’e. Ohin diretora DNPKK hatete katak, servisu ho profesional, ne’e katak, ita nia servisu maka hatudu ita ba profesional.
Iha fatin hanesan, Diretora Nasional Diresaun Nasional Prevensaun Konflitu Komunitaria (DNPKK), Sra. Lidia Lopes de Carvalho hatete, “atu garante estabilidade iha ita nia rai, seguransa tenki hadia uluk lai. Ita boot sira nia servisu importante tebes, tanba imi nia servisu liga kedas ba atendementu publiku, prevensaun konflitus no fo protesaun direta ba komunidade sira. kuandu iha ona garantia estabilidade no unidade nasional maka governu no estadu iha dever atu atu halo prosesu dezenvolvimentu nasional ba povo no nasaun. Tanba ida ne’e, husu ba funsionarius foun sira atu hala’o servisu, tenke hatudu disiplina iha servisu fatin no mos husu atu atende didiak komunidade sira.
Ita Ainaro oan hotu sempre halerik ba risku dezastre naturais, tinan-tinan ita sempre hetan dezastre naturais oi-oin, hanesan inundasaun, erosaun no ai monu afeta husi anin bot. Tanba ida ne’e, ita fo obrigado ba Governu liu husi Ministerio do Interior ba tinan ida ne’e halo rekrutamentu ba ita boot sira. Dadaun ne’e ita boot sira estabelese ona, no ami espera katak ita boot sira sei servisu makas, halo diak liu tan hanesan ema profesional, hodi servi ita nia komunidade iha Distritu Ainaro. Tenik diretora ne’e.
Entretantu Primeiru komandante Bombeiros manufahi, Maijor. Emilio Pereirra Guteres Faria, hatete “Sai funsionariu publiku, tenki hatene sira nia dever atu halo sira nia knar servi ba nasaun ida ne’e. tanba papel serbisu korpu Bombeirus mak fo asistensia ba komunidade ne’ebé sai vitima ba dezastre naturais no fo atendementu ba iha area hamate ahi han uma nian no mos ajuda komunidade, tesi ai ka fiu eletrisidade ne’ebé fo ameasa ba uma komunidade.
Tuir mai Sr. Manuel Carvaleira, Responsavel Rekursu Humanus DNSPP hatete, “Mensajen ba sira maka ne’e, ba funsionariu sira ne’ebe mudansa grau no sira ne’ebe foin rekruta mai, atu servisu masimu fo kontribuisaun dedika an tomak atu servisu ba nasaun ida ne’e. husu ba funsionariu DNSPP sira atu mantein asegura patrimoniu estadu nian inklui governu nia riku soi sira seluk.
Emposada DNSPP, Zelia de Carvalho husi Covalima, haktuir katak, nia servisu iha ne’e tinan hat ona, ejijensia ne’ebe durante ne’e ami preokupa, ohin realiza ona. sente kontente tanba ohin loron sae tan ba level dois. “kontente ho kargu ida ne’e, ha’u apresia polítika foun ba tau estrutura iha nivel distritais sira hanesan ne’e, ne’ebé di’ak tebes, atu bele hadi’a no ajuda, liu-liu parte seguransa sira nia servsiu. ha’u hatene servisu ida ne’e todan mai ha’u, maibe ho fiar husi superior sira, ha’u tenki asumi duni kargu ida ne’e.
Xefi brigada 2 Didi Alves Pereira mos esklarese nia sentimentu haksolok wainhira hetan kargu ne’e, “ksolok bot mai ha’u, maibe hanesan makina estadu nian ha’u sei esforsu an tomak atu servisu makas liutan, tanba Ministeriu fo fiar ida ne’e, tanba hare ba oin servisu todan hein hela ami iha ne’eba. Maibe ami mos sei persija tulun mos husi superior sira, atu hare konaba kondisaun ami nian ne’ebe menus tebes, hanesan fatin, ekipamentus no formasaun.
Bombeiros terseira klase Zelia Jose Maria da Silva mos haktuir, “Korpus Bombeiros Same menus pesoal, sebele Aumenta tan pesoal iha ne’e, nomos ekipamentus hanesan sensor kua ai nian, tanba iha ne’e, risku ba aimonu ne’e akontese semanalmente, dalaruma ami to’o iha fatin akontesementu makina avaria tiha no ami tenki hein tekniku sira hadia lai maka ami uza fali. AX
