Dili-Grupu Feminina Servisu Migrasaun, iha loron 21 Novembru 2018, komemora aniversariu loron Feminina Servisu Migasaun nian ba datoluk, ho tema “Hakbi’it Feminina Servisu Migrasaun Iha Dezenvolvimentu Nasional”, nia objetivu maka atu hakbit partisipasaun feto hodi atinji igualdade jeneru no hametin unidade entre feto iha Diresaun Geral Servisu Migrasaun nia laran. Iha abertura, Sekretariu Estadu Protesaun Sivil (SEPS), Dr. Alexandrino Xavier Araujo, hateten katak, “Ohin ita halo susesu bot ida hodi komemora loron Feminina Servisu Migrasaun nian. Iha ne’e, hau hakarak hato’o ba imi hotu katak, saida mak ita bot sira halo durante loron hirak liu ba ne’e, liu husi kompetisaun desportu no jimnastika ne’e, laos deit atu halo kompetisaun ba malu, maibe atu ita konsolida ita nia hanoin hamutuk hodi servisu diak liutan ba oin. Ho ida ne’e mai ita hamutuk hodi dezenvolve hanoin ida deit lori Timor ba oin, tanba ita mesak Timor oan deit”. entertantu, Diretor Geral Servisu Migrasaun (DGSM), Superintendente Asistente Polisia Boavida Ribeiro, iha nia liafuan badak hateten katak, “tamba sa maka grupu feminina nia ezizensia iha tinan tolu liu ba. Antes ne’e, ami halo diskusaun hamutuk hodi nomeia Sra. Guilhermina F.S Ribeiro atual Diretora Diresaun Geral servisu Korporativu hodi sai hanesan konseleira ba Grupu Feminina Migrasaun nian. Ho ida ne’e maka ami sente katak, presiza duni iha grupu ida ne’ebe maka organizadu atu bele oinsa halo balansu entre feto ho mane iha diresaun ida ne’e. Ikus liu, atu dehan tan katak, inan feton sira ne’ebe mai husi ami nia knosan sorin, ‘susesu ida ne’e, imi mesak labele, ami mesak mos labele, so ita hamutuk maka bele’. Parabens ba feminina Servisu Migrasaun nomos feto Timor-Leste tomak. Iha okajiaun ne’e, Diresaun Geral Servisu Migrasaun atribui mos sertifikadu no taxa ba manan nain sira ne’ebe kompete iha taxa feminina Cup nomos ba parseria sira ne’ebe fo apoiu ba eventu ne’e. Komemorasaun ne’e hetan pertisipasaun husi Sekretariu Estadu Protesaun Sivil (SEPS) hamutuk ho Diretor Geral Servisu Migrasaun (DGSM), Diretora Geral Servisu Koorperativu (DGSK), Komandante Munisipiu Ermera, Diretora Nasionais, Xefi Setor Servisu Imigrasaun SIRA, Xefi jeneru PNTL, Xefi Departamentus sira, Asesor Servisu Imigrasaun, Xefi Jeneru PNTL Munisipiu Dili, Reprezentante Akademia Polisia, parseria sira Kompanha Telkomcel nomos funsionariu sivil sira iha salaun enkontru Ministeriu Interior Vila-Verde. #Alan
