Dili-Iha loron 24 abril 2019, Ministériu Interior liuhusi Diresaun Nasional Prevensaun Konflitu Komunitáriu (DNPKK) ho UN WOMEN konvoka enkontru durante loron ida ho membru Grupu Traballu no ekipa Monitorizasaun no Avaliasaun ba PAN RKSNU 1325 kona-ba Feto, Pás no Seguransa hosi instituisaun Estadu, Governu, PNTL, F-FDTL no sosiedade sivil hodi diskute no haree hamutuk enkuardamentu monitorizasaun ba PAN 1325, matadalan análiza relatóriu no formatu relatóriu hosi UPMA nian. National Officer Program UN WOMEN, Sra. Vicenta Correia hateten enkontru membru Grupu Traballu no ekipa Monitorizasaun no Avaliasaun PAN 1325 atu haree enkuardamentu ba monitorizasaun ne’ebé atu fasilita rekolla informasaun hosi instituisaun Estadu no Governu. “Objetivu hosi enkontru ne’e atu haree hamutuk enkuardamentu monitorizasaun ba PAN 1325 ne’e rasik, oinsa ita bele haree hamutuk hodi bele fó hanoin atu hadi’a enkuardamentu ida ne’e, tanba enkuardamentu monitorizasaun ida ne’e atu fasilita iha hotu bele rekolla informasaun hosi instituisaun ida-idak nian relasiona ho atividade ne’ebé ita trasa tiha ona iha PAN 1325, ne’ebé iha pilár haat ninia okos hanesan Partisipasaun, Prevensaun, Protesaun no Hari’i Pás” esplika Sra. Vicenta.
Iha fatin hanesan Diretora Promosaun PDHJ, Sra. Marina Bernadina Gaio nu’udar mós ekipa Monitorizasaun no Avaliasaun hateten “workshop ne’e importante tebes tanba partisipante sira ne’e membru grupu trabllu no ekipa monitorizasaun no avalaisaun ne’ebé hala’o serbisu ba implementasaun PAN 1325 ida ne’e bele hetan informasaun oinsa atu bele rekolla informasaun sira kona-ba atividade PAN 1325 nian”. Diretora ne’e haktuir PDHJ hola parte iha ekipa monitorizasaun no avalaisaun ba PAN 1325 ne’e tanba haree ba knaar importante nian ne’ebé liga ho direitu feto nian oinsa atu promove feto iha Timor-Leste.
“PDHJ hola parte ona iha ekipa monitorizasaun no avalaisaun atu haree Governu sira-nia implementasaun PAN 1325 ida ne’e, ami-nia kontribuisaun atu halo avaliasaun no fornese relatóriu. Ne’ebé liga mós ho PDHJ ninia serbisu atu promove ema nia direitu, durante ne’e PDHJ halo ba iha direitu feto nian, atu halo advokasia no monitoriazaun ba asuntu direitus umanus ne’ebé afaita ba direitu feto nian no durante ne’e PDHJ halo atividade formasaun no kapasitasaun direitus umanus ba lideransa komunitária no feto sira iha estrutura suku nian hanesan kontribuisaun ida iha atividade PAN 1325,” fundamenta Diretora Marina. Enkuantu Xefe Departamantu Koperasaun Bilaterál, Ministériu Defeza, Sra. Lidia Pires nu’udar membru Grupu Traballu hateten enkotru hodi haree enkuardamentu monitorizaun ne’e asuntu importante ba grupu traballu sira atu bele aprende no hatene oinsa atu halo relatóriu hodi bele implementa atividade ne’ebé trasa ona tuir UPMA ninia formatu. Xefe Departamentu ne’e afirma tinan oin parte Ministériu Defeza sei tau planu kona-ba treinamentu lideransa ba F-FDTL liu-liu ba feto sira tanba haree ba númeru feto sira-nian menus liu iha kbiit atu foti deiszaun. Envolve iha enkontru ne’e kompostu hosi instituisaun estadu, governu no sosiedade sivil DNPKK-MI, MNEC, MSSI, SEII, PDHJ, PNTL, F-FDTL, Acbit, Fokupers, Caucus, Asosiasaun Hak no seluk tan.
Entretantu, implementasaun projetu haforsa feto ninia partisipasaun liuhusi PAN RKSNU 1325 kona-ba Feto, Pás no Seguransa tanba fasilta hosi UN WOMEN no apoiu fundu hosi Japaun dezde periodu 2016 to’o 2020.*CM*
