Dili- Hafoin simu despaisu husi exelensia Ministru Interior interinu, ekipa integradu rua husi ofisiais Polisia Nasional Timor Leste (PNTL), no mos ekipa ida mai husi Ministeriu Interior nian, kompostu husi asesor juridiku nomos kordenadoraora ba organika PNTL nian, hala’o enkontru ho Segundu Komandante Jeral PNTL, Komisariu Polisia Faustino da Costa, hodi halo diskusaun ba lejislasaun nian, liu-liu konaba estatutu pesoal PNTL, Organika PNTL nomos hare ba Regulamentu disiplinar PNTL nian. Iha enkontru ne’ebe halao iha Quartel Jeral PNTL, loron tersa feira ne’e, (4/12), ekipa refere tur hamutuk hodi desidi oinsa mak lezislasaun tolu ne’e bele iha harmonia ba malu. Entertantu konaba estatutu pesoal PNTL nian prontu tiha ona, no antes ne’e, ekipa haruka tiha ona ba iha Ministerio Interior Interinu. falta lezislasaun rua ne’ebe tuir ajenda sei desidi iha loron aban hodi halo mos ba regulamentu disiplinar PNTL nian. Maibe estatutu organiku PNTL ninian sei hein estatutu organiku Ministeriu nia aprova mak bele konsentra fila fali iha estatutu organiku PNTL nian. Ekipa tolu ne’e sei halo diskusaun makas hodi hadia lejislasaun refere, nune’e bele hari’i forsa polisia ida ne’ebe efetivu no dezenvolve polisia nasional Timor-Leste diak liutan iha futuru. Iha okajiaun ne’e, Segundu Komandante Jeral PNTL, husu ba asesor juridiku sira atu servisu hamutuk finaliza lejislasaun ne’e nomos ajuda halo lei, bazeia ba kondisaun real ne’ebe tuir duni natureza PNTL nian. #Alan
