Dili-Iha kuarta feira (08-05-19) ekipa Diresaun Nasional Prevensaun Konflitu Komunitária (DNPKK) hamutuk ho ekipa UN WOMEN no Xefe Gabinete Jéneru PNTL hasoru malu Diretór Centru Formasaun Polisia (CFP), Superientendente Polisia, Arquimino Ramos hodi ko’alia kona-ba koperasaun serbisu hamutuk nomós apoiu hosi UN WOMEN no DNPKK nian ba Sentru Formasaun Polisia. Iha enkontru Diretora DNPKK, Sra. Lidia Lopes de Carvalho esplika “bazeia ba akordu ne’ebé asina hosi MI bo UN WOMEN iha 31 Jullu 2017 hodi suporta MI nu’udar inistituisaun ne’ebé dezenvolve no lidera PAN RKSNU 1325 kona-ba Feto, Paz no Seguransa, liuhusi projetu haforsa feto sira-nia iha instituisaun defeza no seguransa, ne’ebé liga ho PAN 1325 ida ne’e husu atu integra kuríkulu iha Sentru Formasaun Polisia kona-ba direitus umanus, lei umanitária, konvensaun CEDAW, saúde reprodutiva nomós seluk tan”. Diretora akresenta katak iha akordu sita mós atividade PNTL nian atu halo sosializasaun regulamentu no kritériu rekrutamentu PNTL nian ba estudante finalista sira iha nivel ensinu sekundáriu, ne’ebé iha interese atu ba Polisia. “Tanba durante ita haree no akompaña númeru PNTL feto menus tebes maibé mane mak barak liu dala ruma ladún fahe informasaun sira kona-ba kritériu saida mak presiza priense atu sai PNTL ida” ho nune’e parte ida atividade hosi ita-nia projetu ne’e Ministériu atu serbisu hamutuk ho Komando Jeral oinsa atu halo sosializasaun liu-liu ba alin estudante finalista sira ne’e hodi bele apar kritériu rekurtamentu sira ne’e bele prepara-an antes”, Afirma Diretora. Intervensaun Diretór CFP, Superientendente Polisia, Arquimino Ramos hateten “ami-nia kurikulun haruka tiha ona ba Ministru Interior aprezenta ona iha ne’ebé, matéria kona-ba direitus umanus iha. Kritériu no regulamantu rekrutamentu ba feto ho mane sira-nia iha teoria hanesan, fiziku nian mak la hanesan. Kritériu sira uza iha rekrutamentu ne’e sei uza nafatin iha formasaun, ne’ebé feto halai hir, mane halai hira ne’e la hanesan. Hosi rekrutamentu ne’e kuota 30% fó ba feto sira”. Superientendente Polisia ne’e konkorda no presiza atu halo sosializasaun Kritériu no regulamantu rekrutamentu ba estudante sira iha eskola. “Ami iha ne’e preparadu atu la’o no halo sosilizasaun kritériu no regulamentu rekrutamentu ba eskola sira tanba selesaun halo iha ne’e, ezame fiziku mós halo iha ne’e, baibain instrutór sira hao fiskalizaun rekrutamentu ne’e iha ne’e tanba sira iha esperénsia atu fahe fali informasaun ba eskola sira”.
Iha enkontru UN WOMEN no DNPKK loke dalan PNTL liu-liu CFP atu hato’o pedidu halo kapasitasaun TOT ka Treinamentu sai Treinadór ba instrutór Sentru Formasaun Polisia iha munisípiu sira , atu nune’e bele fasilita rasik matéria kona-ba PAN 1325.
Enkuantu iha okizaun ne’e, forma mós ekipa ida atu apoiu serbisu ba implementasaun atividade sira relasiona ho PAN 1325, ne’ebé sei hala’o iha Sentru Formasaun Polisia no sosializasaun kritériu no regulamentu rekrumentu PNTL nian ba eskola sira.
Ekipa ne’ebé envolve iha enkontru ne’e kompostu hosi Diretora DNPKK, Sra. Lidia Lopes de Carvalho, Xefe Departamentu Prevensaun Konflitu (DPK), Sr. Martinho Carvalho Sarmento, Konsultora apoiu serbisu DNPKK Sra. Adelia Guterres, National Program Officer UN WOMEN, Sra. Vicente Correia no Xefe Gabinete Jéneru PNTL, Sra. Daria Ximenes. *CM*
