Dili- Iha loron Sesta Feira ne’e, (10/05/2019), Diresaun Nasional Seguransa Rodoviaria (DNSR), hala’o sensibilizasaun hodi fahe informasaun ba estudante UNTL (Universidade Nasional Timor-Leste), ne’ebe hala’o iha salaun enkontru edifisiu sentral MSSI (Ministeriu Solidariedade Sosial no Inkluzaun) Caicoli. Objetivu husi sensibilizasaun ne’e, hodi koalia konaba regras de tranzito, oinsa lori kareta ho motor iha estrada públiku nune’e estudante sira bele asegura kontra ordenasaun nian konaba infrasaun ka violasaun hasoru kódigu estrada nian inklui fahe mos informasaun konaba legislasaun komplementár sira ne’ebe ligadu ho sinais tranzitu nian. Iha abertura, Diretor Nasional DNSR, Superintendente Asistente Polísia Ismael da Costa Babo hatete katak, sensibilizasaun ne’e atu hasa’e koñesementu no sensibilidade ba estudantes sira, nune’e bele prepara-an ba hases an husi dezastre.
“Iha programa sensibilizasaun ne’e DNSR koopera hamutuk ho DNTT no PNTL hodi halao sensibilizasaun ba ita bot sira ho objetivu maka, atu hasa’e koñesementu no sensibilidade ba estudantes sira, nune’e bele prepara-an ba hases an husi dezastre. Tanba ne’e husu atu ita bot sira atu rona didiak saida maka orsida orador sira sei hato’o ba ita bot sira. persija disiplina wainhira uza estrada tanba ita nia vida importante ba familia nomos nasaun. Entertantu, tuir Vise Dekanu Asuntu Estudante Fakuldade Ciencia Sociais Sr. Bernadro Idalina Leto, M.Sc hato’o agradese ba DNSR ne’ebe mai fahe informasaun ba nia estudante sira.
“Ohin loron tomak, DNSR sei fahe informasaun ba ita tomak iha ne’e, hodi ita labele monu ba risku. Agradese ba DNSR ho nia ekipa mai fahe informasaun mai ita hotu. Iha ne’e estudante sira husi Fakuldade Siensia Sosiais no maioria sira mesak foun deit. Tanba ne’e, husu mos ba estudante sira aproveita didiak atu tuir sensibilizasaun ne’e to hotu. Laos ita mak halo kritika hela deit iha media sosial maibe la fo solusaun. Tanba nee, ohin loron importante ba imi atu Sai orador iha programa sensibilizasaun ne’e mak, Xefi Departamentu Kontra ordenasaun husi DNSR Dr. Alipio Vieira da Costa, Reprezentante Diretor Nasional Transporte Terrestre, Sr. Faustino Soares no Adjuntu Diretor Tranzitu Nasional PNTL, Inspetor Polisia Matias da Silva. Alende ne’e, tuir Xefi Departamentu Prevensaun Seguransa Rodoviaria husi DNSR Sr. Antonio Viegas haktuir katak, planu ba oin sei kontinua halo sensibilizasaun ho alvu mak hanesan estudante, autoridade local nomos funsionariu publiku sira iha postu fronteira. “Programa sensibilizasaun ne’e halo ona ba universidade rua maka hanesan, UNITAL (Universidade Kontinental) no UNTL, tuir mai sei kontinua hala’o iha UNDIL (Universidade Dili) no IOB (Institute of Bussiness). Hafoin iha fulan Maiu nia laran ne’e mos sei halo mos ba Autoridade local iha Munisipiu Aileu nomos Munisipiu Ermera, entertantu iha fulan Juñu sei halo mos autoridade local sira iha munisipiu Manatuto no Liquica. Planu tuir mai sei halo fali iha DIT (Dili Institute of Technic). Iha futuru mai mos sei fo mos formasaun ba funsionariu sira iha postu fronteira Batugade konaba oinsa atu aplika dekretu lei numeru 28/2017 konaba aplika taxa ba veikulu sira ne’ebe atu tama mai teritoriu nasional. #AX.
