Dili—Iha loron Kuarta feira ne’e, 15 Maiu 2019, Diresaun Nasionál Seguransa Rodaviáriu (DNSR) koopera ho Diresaun Nasionál Transporte Tereste (DNTT) no Polísia Nasionál Timor-Leste PNTL), hala’o sensibilizasaun Prevensaun Rodaviariu ba estudante Universidade de Dili (UNDIL), ho objetivu atu habelar no hatutan tan informasaun kona-ba Regras Tránzitu nian ba estudante universitáriu sira, atu nune’e sira, ne’ebe mak utiliza transporte hanesan motor ho kareta, bele iha koñesementu ne’ebe mak klean kona-ba Regras tránzitu nomós bele utiliza transporte hirak ne’e tuir regulamentu ne’ebe mak hatu’ur ona iha kodigu estrada nian. Iha abertura, magnifiku Reitor UNDIL Sr. José Agustinho Belo liu husi nia diskursu hato’o agradesementu wain ba prezensa husi SEPS. “Ohin loron ita nia maun sira husi DNSR, PNTL, DNTT nomos Sekretariu Estadu Protesaun Sivil, mai hamutuk ho ita, atu esplika diak liu tan ita bot sira kona-ba oinsa atu halo prevensaun ba ita nia an husi risku mortalidade wainhira ita uza estrada publiku nomos regras no sinais estrada ne’ebe importante tebes ba ita tomak hodi hatene. Tanba ida ne’e, hanesan Reitor hau lori estrutura UNDIL tomak nia naran, hato’o agradesementu wain ba Sekretáriu Estadu Protesaun Sivil ba oportunidade ne’e bele mai iha fatin ida ne’e. Hein katak UNDIL pronto atu kolabora no koopera ba atividade husi ita bot nia instituisaun”. Hateten Reitor UNDIL ne’e. Entertantu, tuir Sekretáriu Estadu Protesaun Sivil, DR. Alexandrinho Xavier Araujo, liu husi nia diskursu hatete, “Ohin ita sei halo diskusaun oituan kona-ba Prevensaun Seguransa Rodoviária, atu salva ema nia vida no Dezenvolve Nasaun Timor-Leste. Ida ne’e buat ne’ebé mak alin sira bebeik ona sempre hasoru iha dalan. Hanesan Sekretário Protesaun Sivil, ne’ebé mak foin simu tomada de pose iha fulan sia ka fulan sanulu nia laran, tenta para atu bele oinsa atu hala’o servisu Estadu nian tuir orden ne’ebé mak Estadu fo, e mós kapasidade kiik oan ne’ebe mak Hau iha, para atu nune’e bele habelar liu tan servisu Estadu nian husi servisu ne’ebe mak oras ne’e iha dadaun. Nia hatutan, Diresaun Nasional Seguransa Rodoviária tutela iha Sekretáriu Estadu Protesaun Sivil ninian, neste momentu diresaun ne’e sei nafatin ho Protesaun Sivil, karik bainhira organika Ministériu nian promulga ona maka bele iha mudansa. Se karik iha mudansa bele mos mantein ou bele mos integra fila fali ba PNTL. Maibe importante mak Rodaviáriu ba salva vida ita hotu nian liu-liu alin joven sira, alin estudante sira. Regras ne’eb’e mak ita atu fahe iha ne’e, klaru katak alin sira hatene tiha ona, maibé atu fo hanoin tan deit kona-ba lei no regras seguransa ninian. Regras nasaun ida nian regras nasaun Timor-Leste nian, hanesan mós nasaun seluk nian iha regras ne’ebé mak estabilisidu. Hanesan izemplu ki’ik ida maka, wainhira sai motor persija uja kapasete, persija iha karta kondusaun nomos dokumentus propriu sira seluk. Wainhira polísia sira halo pasa revista iha dalan la signifika katak sira halo presaun mai ita maibé sira aplika regras sira ne’ebé mak estabelisidu tiha ona iha ita nia Estadu. Tenik SEPS. Depois de kafe hamutuk, atividade ne’e kontinua ho aprezentasaun topiku husi orador nain tolu mak hanesan, reprezentante husi DNSR, DR. Alipio Viera da Costa, ne’ebé fo espikasaun kona ba lei no kódigu Estrada nian, husi PNTL, Adjuntu Diretór Tranzitu Nasional PNTL, Inspetor Polísia Matias da Silva, ne’ebe fo esplikasun kona-ba kna’ar Polisia Tránzitu no sinais tránzitu, no husi Diresaun Nasionál Transporte Terreste fo esplikasaun kona-ba dokumentus transporte nian.
#Ameu
Estajiadu UNPAZ
