Dili-Atu komemora kampanha 16 aktivismu kontra violensia hasoru feto, Diresaun Nasional Prevensaun Konflitu Komunitaria (DNPKK), hetan apoiu finanseira husi Governu Japaun nomos UN Woman, realiza atividade workshop ida ho tema “Hatene, Hadomi No Proteze O Nia Isin Lolon” hodi komemora loron 16 kampanha ativismu kontra violensia feto ne’ebe halao iha Salaun Enkontru Ministeriu Interior Vila-Verde. Iha abertura, Sekretariu Estadu Protesaun Sivil (SEPS), Dr. Alexandrino Xavier de Araujo, iha liafuan badak hateten katak , “Governu Timor-Leste hatudu ona sira nia rezolusaun bo’ot ida iha sira nia kompromisu hodi hapara siklu violensia hasoru feto. Lei Kontra Violensia Doméstika (LADV), promulga tiha ona iha tinan 2010, lori pozisaun forte ida katak violensia uma laran laos problema normal. Ida nee, hamutuk ho introdusaun ba Planu Asaun Nasionál kona-ba jéneru-bazeia ba violensia iha tinan 2012 nunee mos alvu ba rezolusaun sira seluk ba iha kódigu penal mak hanesan indikasaun moos ida husi kompromisu nasaun nian ba igualdade jéneru no asegura katak feto mos hetan benefísiu husi partisipasaun tomak iha progresu dezenvolvimentu nasaun nian. Tanba ne’e, workshop ohin loron ida ne’e importante tebes ba ita nia inan feton sira, atu bele hare liu kona ba oinsa atu foti medida prevensaun violensia ba feto no labarik sira no mos relasaun reprodutivu inklui mos planeamentu familiar nian. Ne’e duni hau husu ba DNPKK, atu habelar liu tan tan atividade sira hanesan ne’e, nune’e bele aprofunda liu tan kunesementu ba ita nia komunidade sira ne’ebe mak ohin loron la partisipa iha workshop ida ne’e”. Hateten SEPS Dr. Alexandrino de Araujo ba partisipante sira iha salaun enkontru Ministeriu Interior Vila-Verde, (26/11/2018). Workshop ida ne’e hetan partisipasaun masimu husi Diretores Gerais, Diretores Nasionais, membru PNTL (Polisia Nasional timor-Leste), Korpu Bombeiros sira, Korpu Seguransa Patrimoniu Publiku nomos funsionariu sivil husi Ministeriu Interior nian. #Alan
