Dili-Diretora Diresaun Nasional Prevensaun Konflitu Komunitáriu, Ministériu Interior (DNPKK-MI) Sra. Lidia Lopes de Carvalho iha kinta feira (11/04/19) partisipa iha workshop “Konsultasaun no Revizaun Nasionál ba Implementasaun ba Deklarasaun Peking no Plataforma Asaun (BPFA). Workshpo ne’e organiza hosi Sekretária Estadu Igualdade no Inkluzaun (SEII) durante loron ida iha salaun konferénsia Hotel Ramelau Aimutin, ho motivu atu haree hamutuk relatóriu Estadu ba Implementasaun Deklarasaun Peking no Plataforma ba Asaun kona-ba ninia progresu, dezáfiu no rezultadu ne’ebé Timor-Leste atinje ona hosi períodu 2014 to’o 2018, atu submete ba ONU iha 01 Maiu 2019. Entertantu, konteúdu hosi Deklarasaun Peking no Plataforma ba Asaun ne’ebé Timor-Leste adota hatu’ur mós komprimisu globál atu atinje iguldade jéneru no hakbiit feto no labarik feto, ne’ebé foka liubá preokupasaun kritika iha área 12 hanesan; feto iha moris mukit, feto iha edukasaun no formasaun, feto iha saúde, violénsia hasoru feto, feto iha konflitu no armas, feto iha ekonomia, feto iha politika no foti desizaun, mekanizmu instituisaun ba progresu feto, direitus umanus feto nian, feto iha média, feto iha meiu ambiente no labarik feto.*CM*
