Baucau- Ministériu Interior liuhusi Diresaun Nasional Prevensaun Konflitu Komunitáriu (DNPKK) ho UN WOMEN iha tersa feira ne’e (30/04/19) realiza workshop Saúde Reprodutiva no Igualdade Jéneru ba PNTL, F-FDTL no funsionáriu Ministériu Interior husi Bombeirus, Diresaun Nasional Seguransa Patriomóniu Públiku (DNSPP), Diresaun Nasiona Protesaun Sivil (DNPC) inklui mediadora DNPKK iha munisípiu Baucau. Workshop ne’e hala’o iha salaun Uma Dame, Suku Trilolo ne’ebé ofisialmente loke hosi Segundu Komandante PNTL munisípiu Baucau, Superientendente Asitente Polisia, Sr. Joni Viana no akompaña hosi Xefe Departamentu Prevensaun Konflitu (DPK), Sr. Martinho Carvalho Sarmento, Segundu Komandante Komponente Tereste F-FDTL, Maijor Henrique Piedade da Costa (Fitun) no Xefe Gabinete Jéneru PNTL, Inspetora Xefe, Sra. Daria Ximenes. Intervensaun Xefe Departamentu Prevensaun Konflitu (DPK), Sr. Martinho Carvalho Sarmento, ne’ebé reprezenta Diretora DNPKK afirma workshop ne’e importante atu hasa’e konsénsia ema hotu nian no atu hatutan ba ema seluk. “Ha’u hanoin workshop kona-ba Saúde Reprodutiva no Igualdade Jéneru presiza halo beibeik no nafatin atu bele hasa’e ita-nia konsénsia no kapasidade liga ho asuntu sira ne’ebé importante tebes atu habelár informasaun ba malu entre partisipante ho fasilitadór sira. Agora informasaun no buat ne’ebé ita hetan no simu bele hamanas tan atu hatene, bele aprende no simu nafatin, atu nune’e labele haluhan, maibé importante informasaun sira ne’ebé ita hetan kontinua desimina ba ita-nia maluk sira ne’ebé la partisipa iha workshop ida ne’e ”, esplika Xefe Martinho. Iha okaziaun ne’e Segundu Komandante PNTL munisípiu Baucau, Superientendente Asitente Polisia Joni Viana hateten “Relasaun ho workshop hanesan segundu komandante hakarak transmite mós hanoin balun ne’ebé kabe asuntu rua iha workshop kona-ba Saúde Reprodutiva no Igualdade Jéneru. Tanba ita ko’alia kona-ba Igualdade Jéneru sei haree feto sira-nia partisipasaun iha mundu ida ne’e, liu-liu iha rai doben Timor-Leste, feto partisipasaun iha politika, ekonomia, sosiál, agrikultura no seluk tan. Partisipante sira liu-liu PNTL, F-FDTL no Seguransa sivil sira aproveita okaziaun ne’e ho di’ak, garante loron ida tomak sei hetan informasaun ne’ebé di’ak, ita boot sira aprende la’os atu buka pozisaun maibé oinsa atu kapasita no eleva ita-nia koñesiementu atu sai membru ne’ebé di’ak, polisia ne’ebé di’ak no forsa ne’ebé forte iha ambiente moris nian”. Segundu komandante akresenta kona-ba asuntu Saúde Reprodutiva liga ba mentalidade no fiziku. “Tanba ne’e Forsa rua PNTL no F-FDTL ita fó hanoin malu, ita labele hemu tua arbiru, labele han arbiru bainhira mosu moras ruma bele prejudika ba ita-nia knaar, ita-nia misaun priveléjiu ne’e sei la la’o to’o rohan. Saúde Reprodutiva ne’e toka mós ba planeamentu familiar, família kiik ne’ebé moris ho prosepriedade”.
Superientendente Asistente ne’e, husu ba partisipante atu fó atensaun tomak ba matária hosi oradór sira tanba workshop ne’e faz parte eduksaun ida no siénsia ne’e furak bele transforma mentalidade ne’ebé stres. Fasilita matéria iha workshop ne’e parte hosi UN WOMEN ko’alia kona-ba Igualdade Jéneru no Asédiu Seksuál, hosi parte Meries Topes aprezenta matéria kona-a Saúde Repodutiva no Planeamentu Familiár. Atividade ne’e realiza tanba parseria entre DNPKK no UN WOMEN, ne’ebé hetan tulun fundus hosi Japaun hodi implementa projetu haforsa feto sira-nia partisipasaun liuhusi PAN RSKNU 1325 kona-ba Feto, Paz no Seguransa kompostu hosi pilár Partisipasaun, Prevensaun, Protesaun no Hari’i Paz, dezde périodu 2016 to’o 2020.*CM*
