Dili-Diresaun Nasional Prevensaun Konflitu Komunitária (DNPKK) serbisu hamutuk ho Polisia Komunitária nu’udar membru Rede Nasionál Prevensaun Konflitu (RNPK), Gabinete Asesoria Juridiku PNTL no DEJUKDIL iha segunda feira (27/05/19) ne’e hala’o programa Edukasaun Sivika hodi fahe informasaun kona-ba “Prevensaun no Rezolusaun Konflitu, Papel DNPKK, Perigu Konsumu Drogas, Tráfiku Umanu, Lei Armas Brancas, Étika Morál no Reflesaun Esprituál ”, ba lideransa komunitária no juventude iha suku Dare, Postu Administrativu Vera-Cruz. S.E Sekretáriu Estadu Protesaun Sivil, Sr. Alexandrino Xavier de Araújo iha abertura fó parabéns ba lideransa komunitária, juventude no komunidade suku Dare ne’ebé sai ezemplu ba suku seluk tanba volume problema menus. “Ha’u fó parabéns ba suku Dare, aldeia sanulu ne’ebé mak durante ne’e volume problema ladún iha.Tuir ha’u nia observasaun suku Dare sai mós ezemplu ba suku sira seluk iha munisípiu sira hotu tanba laiha volume problema ne’ebé rejista ass. Tanba ne’e liuhusi formasaun ne’e partisipante sira bele fahe informasaun ba malu hodi identifika problema saida mak aas liu iha suku Dare. Ohin programa desiminsaun ida ne’e ko’alia balu atu identifik problema saida mak ass liu iha suku Dare, presiza halo prevensaun hodi labele hamosu problema, ida ne’e mak dalan ita-nian. Ita iha lia nain, ita iha kultura atu tuur hamutuk , ida ne’ebá grave liu kanaliza ba parte justisa.” Esplika S.E SEPS. Sekretáriu Estadu konsidera “rai mak sai problema ne’ebé grave no ass liu iha Timor tanba iha fatin balun hakotu ema nia vida la’os. Problema rai ne’e iha fatin ba fatin kuaze iha Timor laran tomak dala ruma maun no alin mós oho malu, aman ho oan tanba rai ohin loron ninia foli karun. Ita tenke identifik problema ne’ebé mak sai volume ne’eb’e aas liu buka meius tur hamutuk atu rezolve liuhusi dalan diálogu. Iha probelema kiik oan seluk dalaruma tan de’it osan 10 dollar oho malu, dala ruma tan deit feto sa no umane oho malu, maibé problema grave liu iha Timor ohin loron ne’e mak problema rai”. S.E husu ba partisipante liu-liu juventude, lideransa komunitária no membru konsellu suku sira ne’ebé partisipa iha edukasaun sivika ne’e atu sai lalenok no matadalan hodi hatutan informasaun ba foin sa’e sira seluk atu hadook an hosi probelma no buka rezolve probelama liuhusi dalan diálogu. Programa edukasaun sivika ne’e ofisialmente loke hosi S.E Sekretáriu Estadu Protesaun Sivil, Sr. Alexandrino Xavier de Araújo akompaña hosi Diretora DNPKK, Sra. Lidia Lopes de Carvalho, Xefe Suku Dare, Sr. Gil de Araújo, Sr. Pedro Madeira hosi Polisia Komunitária no ensera hosi Xefe Departamentu Prevensaun Konflitu (DPK), Sr. Martinho Carvalho Sarmento.*CM*