Dili-Ekipa teknika médiasaun husi Diresaun Nasional Prevensaun Konflitu Komunitária (DNPKK) ne’ebé tutela iha Sekretariu Estadu Protesaun Sivil, Ministériu Interior (SESPS-MI) Sexta Feira foin lalais (24/01/19) ne’e fasilita mediasaun ho motivu atu solusiona kazu impresta osan ho montante $ 16.400 (Rihun sanulu resin neen atus haat) ho ninia garantia rai no uma.
Mediasaun ne’e hala’o iha salaun Ministériu Interior fasilita hosi ekipa mediadora DNPKK Sra. Joaquina no Evalina Guterres, akompaña hosi Xefe Departamentu Rezolusaun Konflitu, Sr. Julião Fernandes, parte sira ne’ebé envolve iha disputa hanesan Sr. Julio Ximenes Xavier nu’udar osan nain, Sra. Zelia Amelia Freitas, ne’ebé faan uma no Sra. Ida da Costa nu’udar matadalan ba parte rua, inklui mós testamuña sira. Tuir kronolojia badak iha loron 07 Marsu 2017 Sra. Zelia Amelia no Ida da Costa ba impresta osan Sr. Julio Ximenes Xavier ho momante $ 7.000 iha faze dahuluk, hafoin faze daruak empresta tan osan montante $7.000 no iha faze ikus liu foti osan $ 2.400, ho total (16.400) bazea ba akordu sei selu fali osan refere iha loron 7 Setembru 2017, bainhira la selu maka sei entrega rai no uma ne’ebé lokalizadu iha Aldeia Aimutin, Suku Komor, maibé ikus mai la entrega uma ne’e tuir akordu ne’ebé iha.
Entretantu, rezultadu husi mediasaun ne’e parte husi Sra. Zelia Amelia no Ida da Costa ne’ebé faan uma deklara sira-nia parte disponivel atu fó fila osan ho montante 16.400 maibé sei selu husi faze ba faze hosi fulan Marsu to’o Setembru tinan 2019 ba Sr. Julio Ximenes Xavier, bazea akordu no konkordánsia ne’ebé sira sei halo ona.*CM*
