Dili-Diresaun Nasional Prevensaun Konflitu Komunitária (DNPKK) iha kinta feira (23/05/19) ne’e hala’o programa Edukasaun Sivika hodi fahe informasaun kona-ba “Prevensaun no Rezolusaun Konflitu, Papel DNPKK, Perigu Konsumu Drogas, Tráfiku Umanu, Lei Armas Brancas, Étika Morál no Reflesaun Esprituál ”, ba lideransa komunitária, juventude no komunidade sira iha suku foun Ailok, Postu Administrativu Kristo Rei. Programa ne’e realiza durante loron ida, iha sede suku Ailok ne’ebé ofisialmente loke hosi Administradór Postu Administrativu Kristo Rei, Sr. Gaspar da Silva akompaña hosi Diretora DNPKK, Sra. Lidia Lopes de Carvalho, Xefe Departamentu Prevensaun Konflitu (DPK), Sr. Martinho Carvalho Sarmento, Xefe Departamentu Polisia Komunitária, Superientendente Asistente Polisia, Sr. António da Luz. Diretora DNPKK Sra. Lidia Lopes de Carvalho reprezenta S.E. SEPS agradese ba autoridade lokál no partisipante sira ne’ebé fó ona tempu hodi partisipa iha programa edukasaun sivíka ne’ebé organiza hosi DNPKK no RNPK liuhusi kordenasaun serbisu hamutuk ho lideransa komunitária suku Ailok nian. Direjente ne’e esplika katak “DNPKK tutela iha Sekretáriu Estadu Protesaun Sivil ninia serbisu mak atu halibur informasaun kona-ba sinais konflitu ne’ebé akontese iha komunidade sira-nia le’et. Serbisu ida ne’e ami hala’o dezde tinan 2008 to’o agora. Iha eventu ida ne’e Diresaun konsidera nesesáriu hodi halo edukasaun sivíka ba ita-nia juventude sira iha suku Ailok”. Sra. Lidia husu ba partisipante liu-liu juventude sira atu partisipa to’o rohan, atu nune’e bele hetan matéria importante hosi oradór sira hodi kontinua hatutan fali ba juventude sira seluk ne’ebé la partisipa iha programa ida ne’e. Iha okaziaun ne’e, Administradór Postu Administrativu Kristo Rei, Sr. Gaspar da Silva iha abertura hateten “maioria juventude sira gosta mete problema maibé sira seidauk hatene saida mak problema, bainhira akontese ona no afeita ona ba sira-nia an foin hakfodak. Tanba ida ne’e mak DNPKK mai atu fó hanoin fila fali ba ita bele komprende saida mak problema no problema ne’e mak saida. Diresaun ne’e mai atu fahe informasaun ho koñesiementu kona-ba prevensaun konflitu no lei sira atu bele ita evita an hosi problema ne’ebé fó impaktu ladiak ba relasaun moris ema nian”. Xefe Departamentu Polisia Komunitária, Superienetendente Asistente Polisia, Sr. António da Luz agradese mós “ba DNPKK ne’ebé realiza eventu ida ne’e. Eventu ne’e la’os foin mak halo tinan-tinan kuaza halo beibeik iha suku no eskola, ne’ebé envolve mós PNTL hodi fahe informasaun balun relevante ho situasaun iha rai laran, nomós fahe informasaun kona-ba ita-nia lalaok ita ema nian liu-liu oan joven sira iha bairu, eskola no fatin ne’ebé deit. Ha’u naoin ita partilla informasaun ba malu hodi ita komprende no hatutan ba maluk seluk tanba edukasaun sivika ne’e buat importante”. Fasilitadór matéria iha atividade ne’e Xefe Departamentu Rezolusaun Konflitu (DRK), Sr. Julião Fernandes, Padre Niko hosi DEJUKDIL, Inspetór Polisia, Sr. Domingos Gama hosi Gabinete Juridiku PNTL.*CM*