Dili-Diresaun Nasional Prevensaun Konflitu Komunitária (DNPKK) ne’ebé tutela iha Sekretaria Estadu Protesaun Sivil (SEPS) Ministériu Interior iha tersa feira (22/01/2019) hala’o enkontru avaliasaun no aprezenta progresu serbisu DNPKK tinan 2018 hamutuk ho Kordenadór 12 munisípiu no RAEOA, inklui mós Mediadora husi munisípiu Dili, Baucau, Covalima, RAEOA. Enkontru avaliasaun ne’e prezide hosi Sra. Diretora DNPKK, Lidia Lopes de Carvalho akompaña hosi Xefe Departamentu Prevensaun Konflitu, Sr. Martinho Carvalho Sarmento, Xefe Departamentu Rezolusaun Konflitu, Sr. Julião Fernandes no Xefe Departamentu Sekretaria Administrativa iha salaun Ministériu Interior. Diretora DNPKK, Sra. Lidia Lopes de Carvalho iha abertura hatete enkontru avaliasaun ne’e ho motivu atu aprezenta progresu serbisu tinan 2018 nian. “Objetivu husi ita-nia enkontru avaliasaun ne’e atu hato’o progresu serbisu tinan 2018, ne’ebé aprezenta Departamentu Prevensaun Konflitu, Departamentu Rezolusaun Konflitu, Departamentu Sekretaria Administrativa, Kordenadór no mediadora sir.” Dehan Diretora. Diretora agradese ho esforsu Kordenadór Serbisu Prevensaun Munisipál ne’ebé identifika no fornese ona dadus sinais konflitu, organiza atividade diálogu no mediasaun iha munisípiu sira maské hasoru difikuldade oioin. Iha enkontru ne’e avaliasaun ne’e Kordenadór no Mediadora sira hato’o difikuldade no preokupasaun ne’ebé sira hasoru iha baze. Entretantu, reuniaun ne’e marka prezensa mós reprezentante parseiru dezenvolvimentu UN WOMEN, Sra. Vicenta Correia no Asesór hosi SEPS. *CM&SD*
