Caicoli, Loron 9 fulan Maiu tinan 2019, Diretor Jeral Servisus Operasionais Superintendente Xefe Ismael Babo, halao konfrensia Pers Konaba Previzaun tempu ne’ebe akontese Udan no anin boot iha teritoriu Nasional durante horseik to’o ohin. Iha Konfrensia dirijente Máximu ne’e informa ba media nasional sira katak husi Protesaun Sivil ne’ebe tutela ba Ministeriu Interior nia okos husi VIII Governu Konstitusional, liu husi oportunidade ida ne’e fó hatene ou avizu ba públiku katak horikalan diresaun nasional meteorológiku no geofisika Timor-Leste hato’o tiha ona previzaun tempu komesa ohin to’o aban sei akontese hela trovoada (udan no anin ) boot sei afeita iha rejiun leste iha ilha Timor (Munisipiu Lautém, Baucau no Viqueque ) e halai ba to’o kosta sul. ho nune’e lei seguransa nasional fó kompetensia ba autoridade nasional protesaun sivil atu fó alerta no avisu ba populasaun tomak hodi antisipa. Iha oportunidade ida ne’e, dirijente máximu servisu operasional ne’e husu ba populasaun sira liu-liu iha area parte leste no kosta sul ninian atu kopera ho instituisaun relevante, se akontese rai monu no mota boot ne’ebe iha tendénsia atu akontese inundasaun ruma karik favor kontaktu ba funsionariu sira ne’ebe destaka ona iha munisipiu sira e, bele hato’o ba Polisia Nasional Timor-Leste (PNTL), Falintil-Forsa Defeza Timor-Leste (F-FDTL), Bombeiros, Seguransa Sivil, Diresaun Nasional Dezastres Naturais, Pontu Fokal Diresaun Nasional Prevensaun Konflitu Komunitaria ne’ebe destakadu ona iha Munisipiu sira. Diretor Jeral Servisus Operaionais ne’e mos saliente katak, entermus de kordenasaun protesaun sivil mos kordena hela ho instituisaun relevante tuir situasaun ne’ebe akontese dadaun. “Ita hotu hatene katak horseik mota lori kareta ida iha Lospalos, Munisipiu Lautém e Bombeiros konsegue interven e hetan apoiu direita hodi salva komunidade sira iha area ne’eba”. Iha biban ne’e, eis Diretor Nasional Seguransa Rodoviaria ne’e informa ba media sira katak, anin boot no udan afeita mos iha Munisipiu Baucau, ai tohar hodi taka dalan públiku maibe komuniade no Autoridade Lokal sira informa ona ba bombeiros no Polisia hodi hetan intervensaun no normalizasaun iha estrada sira ne’ebe afeitada. Antes termina konfrensia ne’e, Superintendente Xefe Ismael Babo, informa mos konaba situasaun iha Munsipiu Ainaro, komesa horikalan “mobiliza ona ekipa bombeiros halo normalizasaun koa ai ne’ebe taka dalan públiku e kontinua nafatin halo kordenasaun entre ami ho populasaun sira. Ho ida ne’e, liu husi Autoridade Nasional Protesaun Sivil fó hanoin ba ita hotu liu husi mensajen ida ne’e e, husu ba motorista no pasajeirus sira ne’ebe halo viajen husi Díli ba Munisipiu e munisipiu mai kapital Dili ho kuidadu no matan moris neon nain nune’e bele hases a’an husi area ne’ebe iha tendénsia ba dezastre”. #Ekipa Media MI#
