Kuarta-Feira, Loron 19 fulan Dezembru tinan 2018, Diretora Jeral Servisus Korporativus, Sra. Guilhermina F.S.Ribeiro, hamutuk ho funsionarius sira hala’o enkontru avaliasaun servisu iha Gabinete Diresaun Jeral Servisus Korporativus, Vila-Verde, Díli. Objetivu hosi enkontru ne’e hodi avalia no hare mos produtividade servisu tuir kumprimentu divizaun tarefas servisu ne’ebe durante ne’e funsionarius ida-idak simu ona. Iha biban ne’e Diretora Jeral Servisus Korporativus husu ba funsionariu sira mantein nafatin disiplina no kumpri regras ne’ebe estabelese ona husi Komisaun Funsaun Públika. Diretora Jeral mos dezafia funsionariu sira ne’ebe iha area atendimentu no arquivu tenki memoriza karta tama no sai iha kada semana, presija iha atensaun ba servisu atendimentu nian, “imi iha kompetensia hodi hare dokumentus sira ne’ebe tama iha Gabinete servisus korporativus ninian antes entrega mai ha’u” hodi nune labele implika servisu atendimentu nian. Durante enkontru Diretora Jeral Servisu Korporativus exije ba funsionariu sira hatudu disiplina ho responsabilidade tomak ba knar ida-idak nian, e halo kontrolu ba a’an rasik, antes atu kontrola ema seluk e se bele sai mos exemplar ba ema seluk, la presija hatudu ba ema katak ita mak diak liu maibe pelumenus buka kumpri nafatin regras sira ne’ebe estabelese ona. Iha fatin hanesan Diretora Jeral Servisu Korporativus husu ba ofisial Administrasaun no Jéneru presija atu kria enkontru kada semana ho ida-idak nia staf hodi halo avaliasaun interna ba sira, buka hatene sira nia situasaun servisu e kontrola nafatin relatoriu semanal hosi funsionariu ida-idak. Antes remata enkontru ne’e, Diretora Jeral salienta katak “ha’u nia susesu tanba imi nia susesu, ha’u nia frakasu ita hotu nia frakasu” maibe oinsa ita hamutuk buka hadia no lao diak liu tan hodi atinji servisu ho responsabilidade. #Fati#
