Vila Verde- Hanesan bai-bain kada fulan, tama ba iha semana dahuluk Ministeriu Interior hala’o seremonia isar bandeira. Seremonia ne’e normalmente halo iha loron segunda, maibe, governu hasai rezolusaun rua ba Prezidente Republika hodi promulga katak, loron segunda liu ba sai hanesan loron lutu nasional ba matebian saudozu Dom Alberto Ricardo da Silva, ne’ebe fila hikas ona ba aman Maromak nia kadunan santo iha loron 2 Abril 2015.
Iha oportunidade ne’e Diretora Geral Servisu Korporativus Sra. Guilhermina F.S. Ribeiro, ne’ebé prezidi seremonia isar bandeira ne’e, konvida diretores, Xefi Departamentu sira no funsionarius halo “Um Minuto de Silencio” (hakru’uk hodi fo homenajen-Red) ba funu na’in sira ne’ebé sakrafika-an hodi sosa ukun rasik-an ida ne’e.
Tama ba iha sesaun diskursu, Diretora Geral Servisu Korporativus Sra. Guilhermina F.S. Ribeiro fo hatete katak “Primeiru atu hato’o ba Diretores Gerais, Diretores Nasionais, Xefi Departamentu no membrus tomak, boas festa Santo Paskoa ninia ba ita hotu, hein katak ho reisureisaun Nain Jesus nian, bele lori domin no dame ba ita hotu. Segundu hanesan bain-bain, tuir lolos ohin ita nia Sr. Ministru mak hola fatin iha ne’e, maibe tanba Ministru ba hola fatin iha Parlamentu Nasional hodi deskuti orsamentu ratifikativu, tanba ne’e mak ita nia Ministru labele atu hola fatin iha ne’e.
Lia menon hanesan bain-bain, hau husu ba ita hotu atu disiplina ba ita nia servisu atendimentu publiku ne’ebé mak diak tuir ejizensia ita nia sosiedade ninia, nune’e mós ita nia Estadu no Governu no ba ita hotu ne’ebé mak hamrik iha ne’e husi diretores gerais, diretores nasionais, Xefi Departamentu ka seksaun sira iha responsabilidade oinsa atu tau disiplina hodi kontrola ita nia funsionariu sira. Labele abitua an katak diretores sira iha foin ita bo’ot sira iha fatin maibe diretores sira kuandu la iha entaun ita sira ne’e hanesan buat ida karik livre los, ne’e laos responsabilidade iha ida-idak nia nu’udar funsionariu públiku atu atende ita nia atituidades iha ita ida-idak nia servisu fatin atu nune’e dirijente masimu sira mós labele koalia beibeik, atu ezize ba ita bo’ot sira disiplina”.
Diretora ne’e mos hatutan, “Oinsa atu ita hare ita nia patrimoniu estadu ne’ebé mak ita nia resposabilidade, atu uza ita nia patrimoniu tuir ita nia responsabilidade tuir ezizensia estadu ninia ita bele hala’o, atu nune’e ita bele minimiza kazus ba patrimoniu ne’ebé mak iha ita nia responsabilidade hala’o ho responsabilidade katak, ne’e hau nia, ne’e estadu ninia no estadu nia ne’e laos atu halo deit, aat ba mak estadu hadia karik ita nia ezizensia ba iha buat balu barak hela, no ita sei kontinua nafatin ho buat ida ne’e entaun hanesan buat ida ba ita mós, ita nia ezizensia ne’ebé mak ita hakarak governu maka atu fó ba ita ne’e la iha no lia menon ikus maka ida ne’e tanba ne’e husu ba ita hotu kontinua nafatin kaer nafatin disiplina hadia ita nia disiplina halo didiak no mós ba ita nia atitudes. hatete Diretora Geral ba Funsionariu sira.
Ikus liu ha’u fiar katak, iha fulan oin mai, partisipasaun ba seremonia isar bandeira sei diak liutan ida ne’e, tanba ohin funsionarius sira, diretores sira balu la marka prezensa iha ne’e”. hatete Diretor Servisu Migrasaun Sr. Jose da Costa.
Inspetor seremonia ba loron ida ohin ne’e maka Diretora Geral Servisu Korporativus Sra. Guilhermina F.S. Ribeiro, komandante parada maka Inspetur Luis do Carmo, lori bandeira nasional maka Sarjentu Jose Xavier, Sarjentu Moises Mautasi no Sarjentu Alfredo Abel, sai koru ba hino nasional maka ekipa Servisu Migrasaun nian. Komandante pelotaun husi servisu migrasaun nian Guido dos Santos, DNSPP maka Acacio Barros, husi Corpos Bombeiros maka Hermenegildo Lobato, ikus liu ba funsionarius kontratadu ho estajiadus sira maka komanda husi komandante pelotaun Mariano Ana Lopes husi DNPC.
Seremonia ne’e partisipa husi Diretores nasionais, Asesor Nasionais, Xefi departamentus no funsionarius Civil no Servisu Migrasaun PNTL, hodi hasa’e bandeira Nasionál RDTL nian, iha Vila-Verde Dili, ho ambiente ne’ebé paz no dame nia laran. Iku Pires
