DILI- Iha loron Sesta Feira, loron 12 Abril 2019, Diretor Geral Servisu Operasionais Ministeriu Interior, Sr. Domingos Pinto akonpaña husi Diretora Gabinete Assesoria Sra. Domingas Maia Barros, partisipa enkontru nivel liña ministerial ba assuntu preparasaun Timor-Leste nia adezaun ba Association of Southeast Asian Nations (ASEAN), ne’ebé realiza iha salaun institutu diplomático MNEC avenida Portugal. Objetivu husi enkontru refere, atu halo avaliasaun ou follow up ba enkontru ne’ebé hala’o iha loron 2 Abril liu ba. Nune’e kontinua deskuti assuntu tékniku sira ne’ebé parte ASEAN nian polítika. Diretor Geral Servisu Operasionais Sr. Domingos Pinto iha enkontru ne’e hateten katak “Sorumutu ida ne’e kona ba preparasaun ita nia adezaun ba ASEAN. No ohin ita mai partisipa iha enkontru ne’e, hodi koalia kona ba assuntu seguransa nian. Liu-liu konaba oinsá ho progressu ita nia sektor seguransa ninian nomos dezafio saida mak ita hasoru durante ne’, ida ne’e mak ohin ita aprezenta iha reuniaun ne’e” Iha fatin hanesan Diretora Gabinete Assesoria Sra. Domingas Maia Barros ,hateten katak “Hau nia parte hato’o dadus kona ba lejislasaun ne’ebe mak Ministeriu Interior Prepara ona, durante Ministeriu ne’e eziste. Hanesan kona ba lei PNTL, Servisu Migrasaun nomos Protesaun Sivil, nomos lei ne’ebé mak entra em vigor. Ne’ebe aplika tiha ona iha Instituisaun Ministeriu Interior. Dokumentu hirak ne’e, ohin hau entrega ona ba Ministeriu Negosiu Estrangeru no Kooperasaun iha diresaun Assuntu Politika Seguransa – ASEAN nian, hodi bele inventarizasaun ba assuntu legislasaun Ministeriu ne’e rasik, para wainhira Timor-Leste atu adere ba ASEAN karik, sira atu hare ita nia lei sira ba iha seguransa nian mós sai ona sasukat ida atu adere ba ASEAN”haktuir Diretora Gabinete Asesoria. Enkontru ne’e ho Karakter Working group entre ekipa tekniku ministeriu sira,ne’ebe Organiza husi MNEC diresaun Assuntu ASEAN. #LG#
