Kinta-Feira, Loron 7 fulan Marsu tinan 2019, Diretora Gabinete de Asesoria, Sra. Domingas Maia Barros, akompaña hosi Asesora Juridiku Flaviana José Cristovão ho Sr. Januario Amado Soares, partisipa Serimonia Loron Internasional Feto ho Tema “Hanoin Hanesan, Harií ho Matenek, Halo Inovasaun ba Mudansa”, iha Postu Administrativu Liquiça, Munisipiu Liquiça. Iha diskursu Sekretária Estadu Igualidade no Inkluzaun (SEII), Maria José da Fonseca Monteiro de Jesus, hateten katak loron 8 fulan Marsu hanesan loron internasional ba feto hotu iha mundu tomak, selebra loron historia hodi komemora luta feto nian ba igualidade ne’ebe femenista sira nian, ba organizasaun ho esforsu hamutuk ho sidadaun hotu iha mundu tomak defende asuntu direitu ema nian no igualidade jeneru. Iha loron ne’e mos hanesan oportunidade ida atu promove no buka dalan foun hodi halakon bareira, halais progresu igualidade jeneru no hakbit feto no ba labarik feto sira. Timor-Leste hahú selebra loron Internasional Feto iha tinan 1976 iha ailaran ne’ebe rezulta marsa loron 8 fulan marsu. Sekretária Estadu Igualidade no Inkluzaun (SEII) no Ministeriu Negosiu Estranjeiru no Koperasaun (MNEC) hetan apoia makas hosi maluk sira iha nasaun seluk hosi embaxador sira ne’ebe servisu iha Timor-Leste hamutuk ho Autoridade Munisipal no Lokal, Instituisaun oin-oin hodi bele selebra loron internasional feto ho nune’e bele hametin unidade. Mensajen husi loron Internasional ne’e mak oinsa halo reflesaun, advokasia, foti asaun no promosaun ba igualidade jeneru no hakbiit feto no labarik feto sira iha Timor-Leste. Alein de ida ne’e mos atu hamosu no hametin ligasaun feto Timor-Leste ho Feto sira husi rai seluk atu bele fahe esperensia ba malu, apoia malu hodi reforsa advokasia iha nivel internasional bele sai forte liu tan. Eventu ida ohin mos atu komemora susesu hotu feto Timor-Leste nian iha setor hotu, liu-liu setor ekonomia, Polítika, sosial no kultura. Iha tinan 2019 ho tema global iha ambitu selebrasaun loron internasional feto ho tema “Hanoin ho Igualidade, Harií ho Matenek, Halo Inovasaun ba Mudansa”, atu hare oinsa feto sira no espelikasaun, muda maneira hanoin atu planu no investimentu públiku no tetu nesesidade no benefisiu ba feto sira. Serimonia ne’e partisipa hosi Vice Prezidente Parlamentu no membru Parlamentu Nasional Quinta Lejislatura, Membru VIII Governu Konstitusional, embaixador sira iha Timor-Leste, Korpu Diplomatikus, Autoridade Lokal Munisipiu Likisa, Polisia Nasional Timor-Leste (PNTL) no estudante sira. Alein ne’e ekipa komisaun organizadora mos fó tempu ba partisipantes hala’o vizita ba baraka ne’ebe komisaun organizadora prepara ona, iha fatin hanesan partisipante sira koko gratuitamente aihan ne’ebe prepara ona husi grupu ida-idak husi nasaun sira iha mundu maka dadaun ne’e halao hela sira nia misaun diplomatiku iha Timor-Leste e fahe mos esperensia konaba kultura husi nasaun ida-idak. Serimonia ne’e ensera husi Ministru Negosiu Estranjeiru no Koperasaun (MNEC), Dr. Dionisio Babo Soares. #Fatinha#
