Dili-Sekretáriu Estadu ba Protesaun Sivíl Sr. Alexandrino de Araújo hala’o enkontru ho Sekretáriu Estadu Ambiente Sr. Demétrio de Amaral de Carvalho, Vise-Ministru Obras Públikas Sr. Nicolau Lino Freitas Belo nomos reprezentante MSSI (Ministeriu Solidariedade Sosiál no Inkluzaun) Sra. Silvia Verdial da Silva Lopes, hodi kordena hamutuk halo planeamentu hodi dezenvolve sistema servisu nasional ba prevensaun no reasaun lalais kona asidentes graves ho dezastres ne’ebe mosu foin lalais ne’e iha mota ulun Comoro inklui situasaun emergênsia sira ne’ebe akontese iha fulan kotuk ba. Sekretáriu Estadu ba Protesaun Sivíl Sr. Alexandrino de Araújo hafoin remata enkontru ne’e ba media sira hatete katak, dezastre naturais sai hanesan dezafiu sériu ida, ne’ebé persija atensaun seriu. “Sorumutuk ida ne’e hanesan mekanismu ida hodi halo koordenasaun intersetórial, ho instituisoens Governu ne’ebé responsáveis ba jestaun, monitorizasaun no fiskalizasaun kona-ba kestoens dezastre naturais, ho prioridade ba lokalidade ka fatin no área intervensaun, ne’ebé ho risku boot liu ba degradasaun ambiental, sai hanesan dezafiu sériu ida, ne’ebé Timor-Leste tenke fó resposta no kria mekanizmus prevensaun. Hateten Sr. Alexandrino de Araújo iha salaun enkontru VIP Ministeriu Interior, Vila-Verde. Nia hatutan, “Alende ne’e, ami mos koalia klean konaba, atendementu ba komunidade sira ne’ebe mak hetan efeitu husi dezastre naturais, ne’ebe akontese iha ponte CPLP loron13 fulan Marsu tinan 2019. Mota bot tun konsege sobu komunidade nia hela fatin, inklui mota lori vitima ema nain rua, ida ho naran Franzinho Neves no ida seluk naran Imanuel Santos. Entaun nudar membru Governu, iha responsabilidade nafatin para atu oinsa bele rezolve kuandu wainhira ita nia komunidade sira hetan dezastre hanesan ne’e. Ita tenke garantia ita nia populasaun moris iha seguransa nia laran no saudável, instruída no próspera. Governante ne’e afirma tan, “Inudasaun, (mota bot), erozaun (rai monu) no dezlizamentus (ka rai halai), mak kauza degradasaun ba rai no estraga mos kaptasaun bé, hodi hamenus kuantidade no kualidade bé husi rai-okos no ameasa vida selvajen ho rekursus alimentares. Nune’e, ba oin, ita sei kontinua implementa polítika nasionál hodi halo sensibilizasaun ba komunidade sira para labele hela besik iha mota ninin ou mezmu destruisaun meiu-ambiente, nebé, durante ne’e, provoka erozaun beibeik ba rai, inklui hahalok hanesan tá demais ai no sobu ai-laran boot sira, sunu rai no la iha planeamentu hodi provoka inundasoens, estragu ba atividades agríkolas no konstrusaun infraestruturas nomos sei kontinua ho programa reflorestasaun ba áreas ne’ebé estraga ona, liu-liu áreas hanesan foho-lolon sira hadulas Díli no seluktán ne’ebé konsidera prioritárias. Tenik Sekretáriu Estadu ba Protesaun Sivíl ne’e. #AX
