Dili-Bombeiros Timor-Leste, iha Sesta-feira, loron, 24 Maiu 2019, iha resintu kuartel Nasional Bombeiros Caicoli, selebra ninia aniversáriu ba dasanulu resin sia, ho ninia Lema ’’Prontu Atu Servi’’. Sekretariu Estadu Protesaun Sivil, DR. Alexandrinho Xavier Araujo, iha nia diskursu kongratula korpu Bombeiros tomak no enkoraja sira atu bele servisu di’ak liután hodi servi povu no rai doben Timor-Leste. “Antes ne’e, ita hotu hatene katak, Bombeiros maka hanesan liman ain ka komponente operasionál protesaun sivil nian, hodi atende situasaun emerjénsia no dezastre ruma. Maibe ba dadaun ne’e, iha mos komponente operasional seluk ne’ebe tutela iha Sekretariu Estadu Protesaun Sivil maka hanesan, Jestaun Dezastre, Seguransa Patrimoniu Publiku, Protesaun Sivil, Prevensaun Konflitu nomos Seguransa Rodoviaria. Persija hatene mos katak, nudar servisu operasional ita latur iha eskritoriu laran deit, maibe oinsa buka atu halo atendementu ba ita nia povu”. Nia afirma tan, “Ba familia sira husi Bombeiros nian ne’ebe ohin marka prezensa iha fatin ida ne’e, atu dehan deit katak, Bombeiros ne’e hanesan vokasaun ida hodi lao tuir herois da martires sira ne’ebe uluk mos husik hela familia hodi halo knar salva vida. Tanba Bombeiros nia misaun maka atu fó garantia ba prestasaun nó seguransa ba sidadaun hotu nia vida no sira nia sasan. Hamate ahi ne’ebé han uma, ailaran, loja, no fó mós assistensia ba asidentes rodoviarios no salvamentu iha areas rurais, sidade laran inklui apoio ba komunidade ne’ebé hasoru desastres naturais. Nia hatutan, “Hau hakarak fanun ita hotu iha ne’e, mai ita servisu ho fuan bot ho laran luak ba rai ida ne’e. Ida ne’emak ita sente hanesan vokasaun ne’ebe avo sira soe hela mai ita. Ita tenke sente katak nasaun ne’e ita nian. Se ita hadomi ita nia servisu ita mos sei hadomi ita nia povu. Tanba ne’e, hau hakerak Diresaun tutela tenke kuda ona iha povu nia let katak, Bombeiros no kompontente seluk sira tenke kunese. Ikus liu, parabéns ba korpu Bombeiros tomak liu hosi aniversáriu ba tinan ida ne’e, imi bele servisu di’ak liután hodi servi ita nia povu no ita nia rai doben Timor-Leste tuir imi nia lema prontu “Atu Servi”. Hafoin hala’o tiha serimónia, Sekretariu Estadu Protesaun Sivil akompanha husi Vise Xefi Estadu Maior, Reprezentante Ministu Estatal, Diretor Geral Protesaun Sivil, Prezidente Cruz Vermelha Timor-Leste, Reprezentante Embaixada Portugal iha Timor-Leste nomos Amu Kapelaun PNTL, entrega sertifikadu de louvor ba Korpu Bombeiros hamutuk ema nain 12 husi munisipiu hotu. Alende ne’e, Diretor Nasional sira mos entrega sertifikadu formasaun ba primeiru intervensaun ba estudante nain lima husi Universidade da Paz no Eskola Tekniku Informatika, ne’ebe durante ne’e, estajiu Sekretrariu Estadu Protesaun Sivil. Iha oportunidade ne’e, halo mos simulasaun konaba primeiru intervensaun ba insendiu husi estudante estajiariu sira nomos rapelin (tun tali) husi korpu Bombeiros sira. #AX
