Dili- Iha loron Segunda feira ne’e, 15 Abril 2019, Ministeriu Interior liu husi Diresaun Geral Servisu Migrasaun no Ministeriu Justisa liu husi Polísia Sientifíka Investigasaun Kriminál (PSIK), realiza asinatura Memorandu de entendimentu (MoU) ho substansia koperasaun konaba “Ekstensaun Baze Dadus” Interpol ba Diresaun Geral Servisu Migrasaun, ne’ebe hala’o iha Salaun enkontru Ministeriu Interior Vila-Verde. Ministru Interior Interinu, Brigadeiru Jenerál (Ref) Filomeno da Paixão de Jesus hateten katak, kooperasaun ida ne’e importante tebes, no nia husu Servisu Migrasaun nafatin kolabora hamutuk ho PSIK hodi servisu ho efisiensia no efikasia. “Hau hanoin asinatura protokolu koperasaun ida ne’e importante tebes, hodi konsolida nomos reforsa atuasaun Servisu Migrasaun iha ambitu kontrolu ba sidadaun estranjeiru sira. Hau husu Servisu Migrasaun atu kopera ho PSIK hodi reforsa ita nia politika kombate no prevene krime sira ne’ebe fo prejuiju ba estadu. Tanba dokumentu ne’e sei permite ita hodi estabelese padraun husi sistema administrasaun hodi garante legalidade, transparansia, partisipasaun responsabilidade efisiensia efikasia no konsistensia”). Antes termina, atual Ministru Defeza ne’e, sujere atu ministeriu rua ne’e, halo mos MoU ida iha parte kriminal ninian ho nune’e bele halo prevensaun hamutuk ba aktus krime ne’ebe mosu iha teritoriu nasional. Entertantu, Ministru Justisa Dr. Manuel Cárceres da Costa, fundamenta katak, Ministeriu Justisa sei nafatin esforsu atu reforsa koperasaun institusional ho Ministeriu Interior. “Polisia Sientifiku Investigasaun Kriminal, ne’ebe tutela iha Ministeriu Justisa nia okos, sei nafatin esforsu atu reforsa koperasaun institusional ho Ministeriu Interior liu husi DGSM. Ho koperasaun servisu ida ne’e, PSIK sei fo treinamentu liu husi sistema online ida ne’e naran SLTD (Stolen and Lost Travel Document). Ho sistema ida ne’e, bele hadia diak liu tan kualidade servisu no projeta nafatin servisu iha fronteira ho sistema online. Hau espera ho sistema modernu ne’ebe ohin ita asina ona, ita boot sira sei kombate krime oi-oin ne’ebe ema hakarak lori tama mai ita nia rain ou uza ita nia rai hanesan tranzitu ilegal, hau fiar nafatin ba ita boot sira, tanba hau mos parte husi Servisu Migrasaun”. Alende ne’e, Diretor Geral Servisu Mirasaun (DGSM), Superintendente Asistente polisia Boavida Ribeiro, hateten katak, PSIK sei oferese formasaun espesifíku ida liu husi sistema online. “Ohin SM ho Interpol liu husi PSIK, hala’o asinatura hamutuk nota etendimentu (MoU) nomos SOP (standard operating procedure) entre parte rua, konaba oinsa PSIK atu espanda nia dadus online ba Servisu Migrasaun atu nunee bele halo triajen antes sidadaun estranjeiru iha territorio nasional. Alende ne’e, PSIK mos sei oferese treinamentu ida konaba Sistema SLTD-Stolen and Lost Travel Document, nomos oinsa halo koneksaun proprio iha aeroportu ba sistema no aparellu sira Interpol nian, liu-liu kontrolu ba sidadaun estranjeiru sira iha rai laran. Asinatura ne’e rasik, realiza tanba kordenasaun serbisu nebe durante lao entre Servisu Migrasaun husi Ministeriu Interior ho Interpol/PSIK husi Ministeriu Interior”. Akordu ne’e assina husi Diretor Geral Servisu Migrasaun, Superintendente Asistente polisia Boavida Ribeiro ho Diretor Nasionál Polísia Sientifika Investigasaun Kriminál Dr.Vicente Fernandes Brito, no hetan testamunha husi Ministru Interior Interinu, atual ministru defeza, Brigadeiru Jenerál (Ref) Filomeno da Paixão de Jesus ho Ministru Justisa Dr. Manuel Cárceres da Costa. #Fatinha
